UMI  Panorama 20 annosQuasi duo annos ante que le Muro de Berlin cadeva, appareva le prime edition del nove magazin international de novas, Panorama in interlingua. In 2007 illo comencia su 20-esime anno de publication.

Panorama in interlingua es le magazin official del Union Mundial pro Interlingua. Su prime edition appareva in januario-februario 1988 post plus que un anno de preparationes. Panorama esseva le resultato de un fusion del Currero, que esseva le magazin del UMI usque iste momento, e le private Heraldo de Interlingua. Le desiro esseva crear un magazin plus forte, apparente plus sovente e con un numero plus grande de paginas. Inclusive le edition de januario-februario 2007 le redaction ha livrate 3.220 paginas completemente in interlingua.

Le contento del magazin se developpa tote le tempore. Le additiones le plus recente de rubricas permanente include Parolas cruciate in interlingua, Le cocina international (con bon receptas de mangiar), Le parolas del mense (con explicationes de como usar interlingua correctemente) e Le conto del mense (con litteratura original o traducite in interlingua).

Le precio de abonamento del Panorama remane le mesme durante multe annos - solmente 12 euros per anno. Compra un abonamento e supporta interlingua e le UMI.

Lege plus super le historia del Panorama e vide le prime schizzos.