Microgrammatica de interlingua in italiano – e nove films
Sempre plus de inspiration pro usar interlingua activemente, leger bon libros e cognoscer le interessante historia del lingua.
Le materiales in interlingua continua devenir sempre plus abundante in www.interlingua.com.
Le serie de microgrammaticas de interlingua ha essite extendite con un version in italiano. Le microgrammatica es octo parvissime paginas – proque isto es toto que tu debe apprender pro usar le lingua le plus facile in le mundo, interlingua.
Iste supervista fulmine existe ora in svedese, danese, anglese, espaniol, interlingua, francese e italiano. Le microgrammaticas es publicate como files PDF. Assi on pote discargar e imprimer lo in un numero de exemplares e distribuer los inter su familia e amicos como un prova multo persuadente del facilitate de interlingua.
In interlingua on rapidemente apprende le grammatica. Assi on pote dedicar se a augmentar su vocabulario e rapidemente usar le lingua activemente pro communication sin frontieras, como es le motto de interlingua.
Visita le section Dictionarios, grammaticas e cursos pro le micro-grammaticas e multe altere materiales gratuite (dictionarios, grammaticas e manuales de interlingua) in numerose linguas.
Reguarda anque le presentation "Interlingua 75 annos". Le 15 de januario 2026 interlingua habeva 75 annos. Le anniversario esseva celebrate per un festa digital, arrangiate per le Union Mundial pro Interlingua (UMI). Thomas Breinstrup, redactor del Panorama in interlingua, narrava super pioneros e eventos importante desde le apparition del prime obra de interlingua, "Interlingua-English Dictionary", in 1951.
Si tu apprecia libros e bon litteratura, reguarda le presentation inspirante, "10 libros excitante in interlingua". Durante le grande Exposition de Libros in Göteborg, Svedia, in septembre 2025, Claus C. Bruun e Thomas Breinstrup del Union Danese pro Interlingua, presentava in octo minutas un selection multo variate de fascinante libros in interlingua. Le presentation esseva registrate – reguarda lo ci. E compra le libros immediatemente!