Le lingua le plus facile e le plus astute in le mundo celebra un anniversario extraordinari.

UMIInterlingua 75 annos  Interlingua celebra su 75e anniversario le 15 de januario 2026.

A iste data in 1951, le "International Auxiliary Language Association" (IALA) registrava le prime obra in interlingua, "Interlingua-English Dictionary" (Dictionario interlingua-anglese) con circa 27.000 entratas, in le Officio de Derectos de Autor del Bibliotheca del Congresso in Washington, SUA. Le 15 de januario assi es considerate le data de nascentia official del lingua le plus facile e le plus astute in le mundo.

Un equipa global de linguistas e scientistas professional laborava durante 27 annos (1924-1951) in IALA – primo in le Universitate de Liverpool in Grande Britannia e pois in Nove York in le SUA post le eruption del Secunde Guerra Mundial – pro colliger tote le parolas international que forma le vocabulario de interlingua. Le 15 de januario 1951 esseva publicate "Interlingua-English Dictionary" e le 15 de novembre le mesme anno "Interlingua Grammar" (Grammatica de interlingua).

Isto deveniva le initio de un vita successose pro interlingua, que es cata die sempre plus cognoscite e usate gratias al multe activitates de usatores in tote le mundo.

Interlingua es un complete lingua international – un instrumento practic e moderne pro communication international, usate como un qualcunque lingua in scripto e in parlar pro tote scopos. Centos de milliones comprende interlingua immediatemente, proque le ric e comprehensive vocabulario es international, e le grammatica es absolutemente regular – necun exceptiones. Post solmente poc dies on assi lege, scribe e parla interlingua, e post alcun menses on lo usa fluentemente. Gratias a su vocabulario international, interlingua es in ultra de grande assistentia, quando on apprende francese, espaniol, italiano e portugese e lege textos in iste quatro linguas. Interlingua es communication sin frontieras.

Le 15 de januario ha desde 1992 essite celebrate como le Die de Interlingua – un evento commun de parve e grande activitates pro promover interlingua in tote le mundo.

Le 75 annos de interlingua essera celebrate durante tote 2026.

Visita le section Historia de interlingua e studia le grande material con factos, portraits, biographias, curiositates etc.