Invitation al incontro nordic de interlingua in 2026
Le 19e incontro nordic de interlingua es arrangiate le 28 e julio al 1 de augusto 2026 presso Halmstad in Svedia. Veni pro participar – un grande experientia attende.
Nota lo in tu calendario: De martedi le 28 de julio a sabbato le 1 de augusto 2026 le organisationes nordic de interlingua arrangiara le 19e incontro nordic de interlingua presso Halmstad sur le costa west de Svedia – circa 138 kilometros sud de Göteborg e 80 kilometros nord de Helsingborg. Veni pro participar!
Usatores de interlingua ab le paises nordic e de altere locos in le mundo se incontra ci pro usar, parlar e parlar de interlingua de matino a medienocte.
Le incontros nordic de interlingua ha essite arrangiate omne duo annos in annos par desde 1988, quando le tradition esseva fundate pro fortificar le collaboration nordic de promover interlingua in commun. Le incontros ha i.a. habite le previe presidente islandese e ambassador lingual de UNESCO, Vigdís Finnbogadóttir, como protector.
In 2026, le centro conferential Nissaström Kursgård essera le (belle) quadro del incontro. Nissaström Kursgård es special, proque illo es gerite per un ancian alumno del secretario durante multissime annos del Societate Svedese pro Interlingua Ingvar Stenström (1928-2021), qui durante decennios inseniava interlingua a milles de alumnos gymnasial, inter illes Lena Bengtsson, qui assi cognosce multo ben le lingua.
Le precio de participation e un scheda de inscription seque tosto, assi que on pote inscriber se in bon tempore. Seque le novas in www.interlingua.nu, www.interlingua.dk e ci in www.interlingua.com.
Nissaström Kursgård livra pernoctation e ha un restaurante. Illo es situate in un belle area de natura presso le riviera Nissan e es in le ben cognoscite stilo svedese, que participantes de anterior incontros nordic de interlingua recognosce.
Como sempre le incontro offere cursos de interlingua (pro comenciantes e pro plus avantiates), excursiones e multe conversationes inspirante e agradabile plus discussiones super nove initiativas pro promover le cognoscentia a e uso de interlingua. Naturalmente il ha un grande foco a initiativas nordic, ma non-nordicos es como sempre benvenite a participar.
Un programma pro le 19e incontro nordic de interlingua le 28 de julio al 1 de augusto es ora sub preparation.
Lege plus super Halmstad in le Wikipedia in Interlingua.