Continua le viage nordic con plus de cartas postal
Le gratuite serie de viage, Cartas nordic, invita omnes a octo nove locationes in le cinque paises nordic. Usa le cartas pro cursos de interlingua.
Le grande viage touristic in Danmark, Norvegia, Svedia, Finlandia e Islanda continua – e es sin fin.
Octo nove locationes ha essite addite al gratuite serie de viage, Cartas nordic, que ora ha attingite 124 motivos ab le cinque paises nordic. Iste vice tu es invitate a Sønderborg (Danmark), Ystad (Svedia), Helsinki (Finlandia), Fredensborg (Danmark), Vaxholm (Svedia), Kaleko (Danmark), Karrebæksminde (Danmark) e Nexø (Danmark).
"Cartas nordic" comenciava in 2011, e le viage continua ancora a attractiones e locationes interessante. In cata edition del magazin nordic de interlingua, Actualitates, es publicate duo cartas nordic con un photo e un breve description in interlingua del location. Pois es addite cinque questiones, e le cartas es publicate con un mini-mappa, que monstra le location de cata motivo, in formato PDF in www.interlingua.com/instruction con materiales pro le inseniamento e studio de interlingua.
Le idea es que le photo con le breve texto e le cinque questiones sur un singule pagina A4 functiona como un mini-lection de interlingua e al mesme tempore pote inspirar a experientiar mesme le paises nordic.
Numerose personas ha durante le annos contribuite con photos e textos. Le collection continua crescer – remane multissimo a experientiar in le cinque paises.
Viagia mesme con le cartas nordic, e aperi un nove mundo via interlingua.