Le gerentia del Union Mundial pro Interlingua es supplementate per un nove consiliero con longe experientia e laborar in organisationes.

UMI  Christophe Chazarein Béa, 45 annos, ha essite eligite pro le Consilio de Administration del Union Mundial pro Interlingua (UMI) pro tres annos de parte del 1 de januario 2026. Isto occurreva durante le annual assemblea general del UMI le 24 de julio.

Christophe Chazarein Béa es professor independente de francese como lingua secunde e labora in le platteforma in linea Italki. Ille se ha interessate de interlingua durante dece annos e ha durante cinque annos essite membro del Union Interlinguista de Francia. Le nove consiliero ha un longe experientia de laborar in organisationes e in equipa pro developpar projectos e communicar al publico.

In le assemblea general, Julian Mendez de Svedia (le secretario general del UMI desde octobre 2014) e Thomas Breinstrup de Danmark (vice-secretario desde 2025 e redactor del Panorama) esseva ambes reeligite pro le Consilio pro ancora tres annos, anque de parte del 1 de januario 2026.

Donald Gasper de Grande Britannia quita su posto como consiliero post 1½ annos.

Le Consilio de Administration consiste de usque novem membros. Illes es responsabile pro le functiones quotidian e strategic del organisation global. Le UMI es un organisation sin scopos lucrative e labora pro promover e diffunder interlingua. Le consilieros labora sin salario.