Pro dar plus de personas le opportunitate de participar in le successose incontros digital illos cambia die del septimana con effecto del 5 de augusto 2023.

UMISabbato con interlingua  Le successose incontros digital mensual via Zoom, Venerdi con interlingua, ubi on conversa agradabilemente in interlingua, cambia le die e deveni Sabbato con interlingua.

Isto occurre secundo le desiro de usatores nord- e sudamerican, proque le incontro a causa del differentia de tempore actualmente occurre durante le horas de laborar pro illes.

Venerdi con interlingua esseva establite le 15 de januario 2021 – 70 annos post le apparition de interlingua in 1951. Illo esseva pensate como un evento unic, ma le participantes de iste prime incontro esseva si enthusiasmate que illes desirava facer lo un evento mensual lo que illo ha essite desde alora.

Venerdi con interlingua ha usque ora essite le prime venerdi del mense a 20 horas CET. Con effecto de sabbato le 5 de augusto illo deveni Sabbato con interlingua - le prime sabbato del mense, sempre a 20 horas CE(S)T (18 horas UCT).

Pro participar, contacta le secretario general del UMI pro reciper le ligamine a participar via Zoom (via le programma de Zoom o via Zoom in tu navigator favorite de internet).