Un supplemento con 18.000 parolas non includite in le "Interlingua-English Dictionary" e un grande "Quiz de Europa" ha essite publicate.

UMI  Le litteratura in e super interlingua continua devenir plus ric e comprehensive.

Durante le passate septimanas ha apparite ancora duo nove titulos interessante. Carlos Soreto es le cerebro detra le ample "Interlingua-English Dictionary: A Supplement", e Thomas Breinstrup ha scribite e redigite le "Quiz de Europa".

Interlingua continua developpar se como lingua, e su vocabulario cresce con le linguas fonte que es le base del vocabulario international. Pro isto le "Interlingua-English Dictionary" (IED) – le prime obra publicate in interlingua in 1951 – contantemente besonia un supplemento plus extensive pro colliger e registrar omne le extra parolas.

Carlos Soreto, secretario general del Union Mundial pro Interlingua (UMI) 2010-2012 e durante multe annos le representante de interlingua in Portugal, ha durante annos dedicate tempore e energia pro le labor meticulose de assecurar que iste importante labor es facite. Le supplemento actual (de 290 paginas) presenta plus que 18.000 "nove" parolas de interlingua con lor traduction in anglese. Omne le entratas seque le methodologia linguistic detra interlingua, assecurante lor internationalitate e assi lor comprehensibilitate global. Iste supplemento, que contine anque un lista de errores typographic in le IED, assi es un importante obra referntial que essera diligentemente consultate per omne usatores professional de interlingua in le cerca de exprimer exactemente le nuance correcte.

Le precio de "Interlingua-English Dictionary: A Supplement" es 25 euros plus le porto postal.

Thomas Breinstrup, redactor del magazin international de novas Panorama in interlingua, ha elaborate un collection de questiones super Europa, le paises europee e le europeos. "Quiz de Europa" es un tresor de factos presentate in un maniera intertenente e inspirante. Tote le familia o un gruppo de amicos pote concurrer, qui ha le sapientia le plus grande super Europa. Le precio es 9,99 euros plus porto postal.

Visita Litteratura in interlingua pro vider le grande selection de libros in e super interlingua – un lista que continua crescer. Visita anque le Servicio de Libros UMI pro vider multe altere titulos.