Le direction del Union Mundial pro Interlingua es identic, ma le organisation es nove e debe assecurar un diffusion plus grande de interlingua.

UMIUMI  Le sex nomines es le mesme, ma le organisation es toto nove, post que le Union Mundial pro Interlingua (UMI) ha cambiate su statutos e eligite un nove Consilio de Administration.

Isto occurreva durante le prime assemblea general le 2 de novembre. Illo esseva arrangiate digitalmente, e omne membros del UMI esseva invitate a participar.

Le statutos del UMI esseva cambiate in septembre pro facer le organisation plus moderne e plus agile. Le Consilio Executive e le Consilio General esseva unite in le nove Consilio de Administration con 5-9 membros eligite pro un periodo de tres annos secundo un scheda rolante.

Cata interessato es ora membro directe del UMI pro diminuer le administration, ma le organisationes national de interlingua continua in le paises ubi illos labora.

Il habeva sex candidatos pro le Consilio de Administration, omnes ha functionate in le ancian Consilio Executive que ora ha cessate. Omne le sex esseva eligite, e proque isto esseva le prime assemblea general annual, lor periodo de election esseva fixate assi: Madeleine Mahé, Francia (1 anno), Barbara Rubinstein, Svedia (1 anno), Martijn Dekker, Nederland (2 annos), Alberto Mardegan, Finlandia (2 annos), Julian Mendez, Germania (3 annos), Thomas Breinstrup, Danmark (3 annos).

Alix Mahé-Potet, Francia, esseva eligite membro del commission electoral que essera supplementate per ancora duo personas ante le proxime assemblea general in le fin de 2023.

Durante le prime session del nove Consilio de Administration on distribueva le postos. Madeleine Mahé continua como presidente del UMI, Julian Mendez como secretario general, Martijn Dekker como vice-secretario e Alberto Mardegan como tresorero. Thomas Breinstrup e Barbara Rubinstein es consilieros ordinari, e Thomas Breinstrup in ultra continua como le redactor in chef del magazin international de novas, Panorama in interlingua, que le UMI publica desde 1988.

Un plano de labor es sub elaboration. Illo include bon ideas presentate per participantes in le assemblea general.

Le Union Mundial pro Interlingua esseva fundate le 28 de julio 1955 durante le prime congresso de interlingua in Tours, Francia.