Le Union Mundial pro Interlingua essera reorganisate pro facilitar le labor de promover interlingua in tote le mundo.

UMIUMI  Le organisation principal del promotion de interlingua, le Union Mundial pro Interlingua (UMI), devenira plus moderne e plus agile.

Isto occurre post que le statutos ha essite modernisate. Le nove statutos substitue le statutos ab 2006 e reflecte le desiro de facer le UMI plus active.

Le cambio principal es que le existente Consilio Executive e le Consilio General essera unite in un nove Consilio de Administration, al qual le 5-9 membros es eligite pro un periodo de tres annos cata uno secundo un scheda rolante via le annual assemblea general, ubi on pote participar in persona o in linea.

"Le statutos debe esser plus agile e plus practic e – lo que es importante – in validitate pro nostre communitate. Nos vole facer interlingua plus grande, plus acceptate e plus usate," explica Julian Mendez, le secretario general del UMI.

Le nove Consilio de Administration comprehendera al minus le presidente, le secretario general, le vice-secretario e le tresorero. Le Consilio de Administration essera responsabile pro le labor quotidian e strategic del UMI.

Un altere cambio es que cata persona pote esser directemente membro del UMI. Isto non esseva permittite in le statutos ancian e complicava le situation pro illes qui vive in paises in un organisation national de interlingua. Con le nove statutos, on paga su membrato – e su abonamento de Panorama in interlingua – directemente al UMI.

Le UMI arrangiara le prime assemblea general secundo le nove statutos le 2 de novembre 2022. Omne membros recipera tosto un invitation a participar in linea.

Le nove statutos esseva approbate per le Consilio General del UMI in septembre e entrara in vigor con le election del nove Consilio de Administration le 2 de novembre 2022.

Le UMI esseva fundate le 28 de julio 1955 durante le prime congresso de interlingua in Tours, Francia.