Le Union Mundial pro Interlingua (UMI) arrangiara pro le prime vice su conferentia international totalmente in modo digital. Isto significara que il essera gratuite participar.

UMI24e conferentia international de interlingua  Le 24e conferentia international de interlingua arrangiate per le Union Mundial pro Interlingua (UMI) in augusto essera totalmente digital. Isto essera le prime vice in le historia del conferentias international que comenciava in 1955.

Le consilio executive del UMI ha decidite concentrar se super le arrangiamento de un ambitiose conferentia digital con un variate programma inspirante e capturante. Le decision significa que il non habera un conferentia physic.

Plus flexibile – e tres sectiones cata die

Le incertitude continue causate per le coronavirus faceva le UMI decider que un conferentia physic risca esser cancellate in le ultime momento. Isto causarea problemas pro participantes qui ha comprate billetes etc. Pro evitar iste situation le UMI ha prendite le decision ja ora.

“Ora quando nos sape que le conferentia essera totalmente digital, illo nos da melior tempore pro arrangiar toto e sperabilemente includer multo plus de presentatores, proque illes non debe calcular con costos de viagiar. Isto anque face le planification multo plus flexibile, proque nos usque poc tempore ante le conferentia ancora ha possibilitates de obtener le ultime accordos e arrangiar le ultime detalios,” dice Madeleine Mahé, presidente del UMI.

Le 24e conferentia international de interlingua habera loco le 1-6 de augusto 2021.

Illo essera dividite in tres sectiones in differente partes del die, assi que plus de personas pote participar, e pro evitar fatiga ante le schermo. Le tres modulos essera planificate pro 11.00-12.00 horas CEST (09.00-11.00 h. UCT), 15.00-16.30 horas CEST (13.00-15.30 h. UCT) e 20.00-21.30 horas CEST (18.00-20.30 h. UCT).

Participation gratuite ma inscription es necessari

Sub planification es sessiones de themas specific, presentationes in interlingua e topicos multo variate, presentationes del ganiatores del nove concurso de films “Io ama interlingua”, cursos de interlingua, excursiones virtual etc.

Le participation in le 24e conferentia international de interlingua essera gratuite, proque il non habera costos pro locar salas conferential etc. Naturalmente on debe sempre inscriber se pro participar. Sperabilemente le inscriptiones pote occurrer ab maio o junio. A iste tempore le UMI anque spera poter communicar plus concretemente super punctos in le programma.

Le prime conferentia international de interlingua occurreva in 1955. Durante iste conferentia le Union Mundial pro Interlingua esseva fundate. Le conferentias international de interlingua es biennal. Le plus recente esseva arrangiate in 2019 in Praga in Tchechia.

Visita le pagina con le conferentias international de interlingua.