Invitation: Nove incontro digital in Zoom
Le Union Mundial pro Interlingua invita de novo interessatos de interlingua a un incontro digital.
Post le successo al Die de Interlingua in januario, le Union Mundial pro Interlingua continua le incontros digital con usatores active de interlingua.
Le UMI assi organisa un nove incontro digital venerdi le 5 de martio 2021 a 19.00 horas UTC (20.00 horas CET) via Zoom. Le duration approximate es un hora.
De novo, le incontro es un possibilitate de assemblar interessatos active de interlingua, qui desira supportar le promotion e diffusion de interlingua. Un prime e importante passo es cognoscer le unes le alteres. Alora veni automaticamente le inspiration e le excambio de ideas.
Durante le incontro digital al Die de Interlingua le 15 de januario, quando interlingua habeva 70 annos, plure participantes exhortava le UMI a continuar le incontro successose con un agradabile atmosphera amical.
Pro participar in le incontro e reciper le instruction de como connecter se al evento, que naturalmente es in interlingua, on debe registrar se presso le secretario general del UMI, Julian Mendez.
Ille anque va gerer le incontro pro un conversation agradabile e inspirante in interlingua.
Le UMI spera que multes va utilisar le chance pro supportar le communitate vivente e active de interlingua.