Le multe nove materiales pro cursos in interlingua invita i.a. a Copenhagen in Danmark, a Bologna in Italia e al Bursa de Bira in Berlin. Discarga le materiales gratuitemente.

UMI  Le collection de materiales pro cursos in interlingua continua crescer. Cinque nove invitationes es preste pro un viage con interlingua a Danmark, Svedia, Germania e Italia.

In le serie "Viages con interlingua", nos va ora visitar le Bursa de Bira in Berlin in Germania (vide le photo), le urbe Bologna e un village de montania sin nomine, ambes in Italia. Le serie es elaborate pro le Vesperes de Interlingua in Copenhagen, Danmark, un gratuite curso de conversation arrangiate per le Union Danese pro Interlingua un vice per mense in le centro del capital danese. Le Vesperes de Interlingua ha continuate desde 1992.

"Viages con interlingua" es un serie con textos con conversationes in interlingua pro assi demonstrar le linguage quotidian. Le dialogos es assatis breve e contine multissime parolas e expressiones que on usa cata die. Varie personas pote prender un rolo e assi conversar. Il ha anque belle photos del destinationes que es visitate, e - pro le recente "episodios" - il ha sempre un pagina con exercitios amusante e capturante pro le texto, assi que on pote testar, si on ha comprendite toto. Le material es in le formato PDF, assi que on facilemente pote imprimer lo in colores (o blanc-nigre). Il ha ora 10 "episodios", e plures va venir.

37 cartas nordic con photos, mappas e questiones
"Cartas nordic" es un altere serie con un carta illustrate de un location in un del cinque paises nordic: Danmark, Norvegia, Svedia, Finlandia e Islanda. Le carta contine un breve texto descriptive del loco e un mappa que monstra le position. Sub le carta il ha sempre cinque questiones al texto. Il ha ora 37 cartas nordic a discargar in le formato PDF.

Le nove cartas veni ab Copenhagen in Danmark e tracta le interessante petras milliari (vide le photo) e de Landa in Svedia, multo proxime al recente 20me conferentia international e 14te incontro nordic de interlingua in julio 2014. In Landa se trova un fascinante ecclesia rural cuje interior es multo special.

Le cartas nordic originalmente es publicate in le magazin nordic de interlingua, "Actualitates", con duo in cata magazin. Postea, le Vesperes de Interlingua in Copenhagen elabora le questiones pro le texto, e finalmente le cartas es publicate de novo in www.interlingua.com/instruction, del qual on pote discargar un multitude de materiales pro le inseniamento e cursos de interlingua.

Tote le material es in interlingua, assi que illo es universal.

Visita Multe materiales pro le inseniamento de interlingua, e discarga tote le materiales gratuite