"Casa aperte" e reunion annual del Societate Svedese pro Interlingua es nove punctos in le grande arrangiamento de interlingua in julio in Svedia.

UMI  Le preparationes pro le grande arrangiamento estive de interlingua - le combinate conferentia international e incontro nordic - in julio in Svedia continua. Nove activitates va esser addite, le plus recentemente le "casa aperte" e le reunion annual del Societate Svedese pro Interlingua.

Le 20me conferentia international de interlingua e le 14te incontro nordic de interlingua habera loco del 29 de julio al 3 de augusto 2014 in le centro Löftadalens Folkhögskola in le citate balneari Åsa, situate justo vicin al mar, sud de Göteborg. Le arrangiamento va durar sex dies e attraher participantes de tote le mundo.

Un programma preliminar ha essite publicate, ma le activitates pro le sex dies continua developpar se usque le arrangiamento.

Jovedi, le 31 de julio, a 13-15 horas il habera un "casa aperte". Isto es un invitation al publico de venir e orientar se super interlingua e su multe possibilitates. Le "casa aperte" va presentar certe activitates, e naturalmente anque le pressa es invitate.

Venerdi, le 1 de augusto, le Societate Svedese pro Interlingua (SSI) va haber su reunion annual inter 13 e 15 horas. Le SSI es le arrangiator principal del combinate conferentia e incontro, in collaboration con le organisationes de interlingua in Danmark, Norvegia e Finlandia e con le Union Mundial pro Interlingua.

On pote ancora obtener un reduction del precio de participation. Si on se inscribe - e paga - ante le 31 de maio, le SSI reduce le precio con 500 coronas svedese o 44 euros. Assi on solmente debe pagar 3.500 SEK/400 EUR in vice del normal 4.000 SEK/444 EUR.

    Inscribe vos ante le 31 de maio 2014 pro reducer le precio

  • Veni 6 dies al "superconferentia nordic" o "festival de interlingua" pro solmente 4.000 SEK/444 EUR.
  • Toto es includite in le pacco: omne repastos + camera con 5 noctes + cursos + excursiones + belle natura vicin al mar + agradabile participantes ab multe paises pro solmente 4.000 coronas svedese/444 euros per persona (ab lunch le 29 de julio al lunch le 3 de augusto, inclusive).
  • Usa le scheda de inscription e inscribe vos al plus tarde le 31 de maio 2014. Alora tu obtene un reduction de 500 SEK per persona. Assi le precio es solmente 3.500 SEK/400 EUR per persona pro omne sex dies.