Le organisatores del combinate conferentia international e incontro nordic de interlingua le 29 de julio al 3 de augusto 2014 prolonga le possibilitate de sparniar moneta usque le 5 de junio. Inscribe vos hodie pro un experientia exceptional.

UMI  Omnes, qui reage promptemente, gania un reduction de 44 euros per persona, si illes se inscribe pro le grande evento estive de interlingua in julio ante le 5 de junio 2014.

Le organisator principal del combinate 20me conferentia international e 14te incontro nordic de interlingua in Åsa in Svedia, le Societate Svedese pro Interlingua, ha decidite prolongar le possibilitate de obtener le reduction usque le 5 de junio. Originalmente le limite expirava le 5 de maio.

Le organisatores spera que isto va attraher plus de participantes ab tote le mundo al conferentia/incontro que ha loco in le popular citate balneari Åsa justo al mar sur le costa west de Svedia le 29 de julio al 3 de augusto 2014. Åsa es situate 45 km al sud de Göteborg, le secunde plus grande urbe in Svedia, e assi facilemente attingibile per avion. Le schola internato es situate sur un rocca con un vista belle supra le mar Kattegat.

Sex dies con experientias exceptional

Le grande evento es pro tote le familia e offere cursos de interlingua (un curso basic pro omne nove usatores e un curso de conversation pro illes, qui ja parla e scribe interlingua), multe presentationes, activitates pro omnes, excursiones a locos interessante, informationes super le labor de diffunder interlingua, intertenimento e naturalmente multissime possibilitates pro usar interlingua per conversar e amusar se con omne le altere participantes.

Le programma es sub preparation e va tosto esser publicate e, naturalmente, inviate directemente a omne participantes. Iste anno le labor "seriose" essera minus dominante pro in vice crear un bon tempore insimul con tempore pro reposar in bon compania, pro conversar (multo ... e preferibilemente in interlingua, naturalmente), participar in excursiones interessante in le area, pro audir presentationes e discursos interessante (in interlingua ma non necessarimente super interlingua) e simplemente haber sex bon dies insimul, sperabilemente con tote le familia como participantes.

Toto es includite in le precio

Le Union Mundial pro Interlingua, le Societate Svedese pro Interlingua, le Union Danese pro Interlingua, le Union Norvegian pro Interlingua e le Association Finlandese pro Interlingua organisa le combinate conferentia e incontro in commun e gaude vider multissime participantes ab tote le mundo a sex dies amusante, interessante e excitante.

Le precio, que include omne repastos, cinque pernoctationes, cursos, excursiones, le belle ambiente, le mar e participantes agradabile, costa solmente 3.500 SEK/400 EUR, si on se inscribe ante le 5 de junio 2014. Si on se inscribe post iste data, le precio cresce a 4.000 SEK/444 EUR, dunque hasta inscriber te e apporta anque tu familia pro un septimana multo special e agradabile in le belle Svedia.

Visita www.interlingua.dk/nordic2014 pro leger plus e sequer le novas le plus recente e usa le scheda de inscription immediatemente.

    Inscribe vos ante le 5 de junio 2014 pro reducer le precio

  • Veni 6 dies al "superconferentia nordic" o "festival de interlingua" pro solmente 4.000 SEK/444 EUR.
  • Toto es includite in le pacco: omne repastos + camera con 5 noctes + cursos + excursiones + belle natura vicin al mar + agradabile participantes ab multe paises pro solmente 4.000 coronas svedese/444 euros per persona (ab lunch le 29 de julio al lunch le 3 de augusto, inclusive).
  • Usa le scheda de inscription e inscribe vos al plus tarde le 5 de junio 2014. Alora tu obtene un reduction de 500 SEK per persona. Assi le precio es solmente 3.500 SEK/400 EUR per persona pro omne sex dies.