Declaration Universal del Derectos Human
Le projecto United Sounds collige registrationes in omne linguas del mundo del "Declaration Universal del Derectos Human", assi anque in interlingua.

UMI  Tote le "Declaration Universal de Derectos Human" pote ora esser ascoltate in interlingua in un grande projecto que essaya colliger material audio de omne 382 traductiones differente.

Le documento es historic. Illo esseva proclamate per le Assemblea General del Nationes Unite le 10 de decembre 1948 e describe standards commun pro proteger le derectos human universalmente. Illo esseva traducite per le ex-secretario general del Union Mundial pro Interlingua (UMI), Piet Cleij in Nederland, pro le Nationes Unite in occasion del 50esime anniversario del declaration in 1998 e esseva publicate per le Officio del Alte Commissario pro Derectos Human.

United Sounds es un projecto que vole assecurar que le plus grande numero possibile del in toto 382 traductiones del declaration pote esser ascoltate in Internet. Martijn Dekker, vice-secretario nederlandese del UMI, ha registrate le texto complete pro le projecto.

"Le Declaration legite in simulte linguas mundial devenira un importante archivo que contribuera al discussion del derectos human universal. Le addition de interlingua essera multo appreciate," dice Alexandra Stiver de United Sounds.

Le registration in interlingua ha essite recipite multo positivemente:

"Qual excellente registration clar ... multe gratias pro adder interlingua al projecto!" scribe le organisatores.

Ascolta "Le Declaration Universal del Derectos Human": http://soundcloud.com/mcdutchie/declaration-universal-del

Discarga le texto d "Le Declaration Universal del Derectos Human" directemente del Nationes Unite:http://www.ohchr.org/en/udhr/pages/language.aspx?langid=1119
o del Bibliotheca electronic in interlingua: http://www.interlingua.com/e-libros-derectos