13tie incontro nordic de interlingua
Le costa west de Svedia es un idyllio, specialmente durante le estate. Billströmska Folkhögskolan (a sinistre) essera le centro conferential in julio 2012. Illo es bellemente situate proxime al mar (photo inferior). Photos: Billströmska Folkhögskolan

Juvenes in particular es incoragiate a participar, quando le organisationes nordic de interlingua arrangia le 13tie incontro de interlingua in un insula al nord de Göteborg in Svedia.

[Actualisate 2012-01-24]

UMI  Pro le 13tie vice, le quatro organisationes de interlingua in Danmark, Norvegia, Svedia e Finlandia invita omnes, qui se occupa de interlingua, al incontro traditional con 2½ dies de cursos intensive e 2½ dies de conversationes practic de como diffunder le cognoscentia a e le uso de interlingua.

Le 13tie incontro nordic de interlingua habera loco le 25-29 de julio 2012 – de mercuridi a dominica – in Tjörn, circa 60 km al nord de Göteborg e assi facilemente attingibile per avion al aeroporto Göteborg/Landvetter, per ferrovia e per le autostrata E6. Isto es le prime vice que un incontro nordic es arrangiate sur un insula. Nam Tjörn es le sexte grande insula de Svedia (post Gotland, Öland, Orust, Hisingen e Värmdö), situate al belle costa del region Bohus verso le mar Kattegat. - Lege plus super Tjörn in le Wikipedia in interlingua.

Tres cursos intensive de interlingua

Mappa de SvediaSur Tjörn, le schola internato Billströmska Folkhögskolan deveni le centro conferential, e le arrangiatores spera que multes – non solmente del cinque paises nordic – va participar. Un invitation special va a juvenes e altere nove comenciantes, qui desira apprender e usar interlingua e forsan anque participar in le labor plus active pro informar alteres super le lingua e su possibilitates pro communication sin frontieras.

Il habera tres cursos: uno pro comenciantes, uno pro illes qui ja pote usar interlingua un poco, e un tertie pro illes qui ja cognosce interlingua ma desira plus de eloquentia in conversation. Le cursos comencia mercuridi antemeridie le 25 de julio e dura usque le postmeridie venerdi le 27 de julio. Pois comencia le incontro nordic que dura usque dominica post le lunch.

Excursiones, conversationes e amusamento

Durante le sojorno il habera excursiones, e il ha bon tempore pro simplemente conversar - in le linguas nordic e in interlingua. Cantos e musica sole anque esser un parte importante del incontros nordic.

“Reserva le septimana 25-29 de julio 2012 pro un sojorno in un insula con natura bellissime, proxime al mar pro banios,” dice Ingvar Stenström, secretario del Societate Svedese pro Interlingua que es le organisator principal del incontro.

Inscribe vos hodie - e memora le familia

Le scheda de inscription con precios es ora trovabile in le varie sitos nordic de interlingua in le linguas local. Omnes extra le paises nordic pote trovar le version in interlingua ci (in formato PDF). Inscribe vos ja hodie, e memora tote le familia. Le ultime data de inscriber se es le 15 de maio, e le pagamento - 300 euros pro omne cinque dies inclusive pernoctation e omne repastos - debe esser pagate ante le 31 de maio. Lege tote le detalios in le scheda.

Le incontros nordic comenciava in 1988 e ha desde alora essite arrangiate omne duo annos – in le annos par. Omne usque ora 12 incontros ha essite arrangiate in Svedia in differente locos.

Le ambassador lingual de UNESCO, le ex-presidente islandese Vigdís Finnbogadóttir, ha essite protector pro le incontro nordic.


Scheda de inscription al 13tie incontro nordic de interlingua (in formato PDF)

Le lista del incontros nordic de interlingua: www.interlingua.com/historia/conferentias/incontros.htm