Interlingua esseva de novo presentate inter premiatos de Nobel e quasi 100.000 visitatores al plus grande exposition de libros in Scandinavia.

UMIUMI  Milles de personas esseva informate super interlingua, quando le Societate Svedese pro Interlingua de novo participava con su proprie stand al exposition le plus grande de libros in Scandinavia, Bok & Bibliotek (Libro & Bibliotheca), in septembre.

Durante quatro dies, del 22 al 25 de septembre, le exposition in Göteborg al costa west de Svedia attraheva quasi 100.000 visitatores qui poteva trovar inspiration litterari e lingual in 927 stands, durante que plus que 1.400 jornalistas ab tote le mundo reportava super le evento que anque attraheva premiatos de Nobel como Herta Müller e Mario Vargas Llosa.

Le Societate Svedese pro Interlingua distribueva brochures e informava le multissime passantes super interlingua e su possibilitates. Centos e ancora centos de personas esseva informate per le gruppo de labor con Nils Kangas, Inger Maria Olsson, Barbara Rubinstein, Alexandra Cangas, Erik Enfors, Bengt Enqvist, Gunaino Enqvist e Magdalena Voxerbrant - le ultime un membro toto nove del SSI.

Le stand de interlingua monstrava un selection de manuales, dictionarios e libros belletristic in interlingua.

Bok & Bibliotek 2012 es arrangiate le 27-30 de septembre e essera un manifestation cultural del paises nordic.



Sur le photo se vide (de sinistre a dextere) Magdalena Voxerbrant, Nils Kangas e Erik Enfors in le stand del Societate Svedese pro Interlingua (SSI) al grande exposition litterari Bok & Bibliotek in Göteborg in septembre 2011. Photo: SSI