Almanac de Interlingua es un gratuite magazin digital, que ja ha lectores in tres continentes.

UMIUMI  Un nove magazin mensual completemente in interlingua - e completemente digital - ha ja lectores in tres continentes.

In octobre, le brasiliano Cláudio Brandão Rinaldi, qui habita in São Paulo in Brasil, publicava le prime edition de Almanac de Interlingua. Illo es un magazin cultural gratuite con multe articulos e illustrationes, scribite pro crear plus de interesse pro interlingua e pro publicar informationes super cultura.

Le quarte edition appareva in januario 2010 e contine i.a. un grande articulo super "Le curiose theses de Yves Cortez" - super le ver origine del linguas romanic.

Abonamento gratuite

Almanac de Interlingua al momento circula in al minus sex paises in America del Nord, America del Sud e Europa, ma Cláudio Rinaldi audi con placer de altere interessatos, qui desira reciper le magazin gratuitemente.

Illo appareva in le formato PDF, assi que on pote leger lo sur le schermo o imprimer lo mesme in su casa. On pote confirmar su interesse per le addresses electronic cbrinaldi21@yahoo.com.br e almanacdeinterlingua@yahoo.com.br, per le blog http://almanacdeinterlingua.blogspot.com, o ancora per le communitates de Interlingua in Orkut e in Facebook.

Cláudio Rinaldi ha usate interlingua desde 2000 e contribueva con articulos e traductiones al revista Internovas, publicate per le Union Brasilian pro Interlingua (UBI). Si hobbies principal es scriber historias e studiar linguas.

Le illustration monstra le prime pagina del edition de januario 2010 del Almanac de Interlingua.