Le radio popular celebra su prime jubileo per presentar un paletta de possibilitates pro usar interlingua activemente.

  Radio Interlingua celebra su prime plen anno in Internet per su 13tie emission que - multo aptemente - presenta un grande paletta de manieras in le quales on pote sempre usar e practicar interlingua.

In le emission jubilari, Martijn Dekker de Nederland, recentemente eligite nove vice-secretario del Union Mundial pro Interlingua, es le moderator, qui presenta tote le contento in vice del redactor normal, Péter Kovács de Hungaria. Radio Interlingua esseva revivificate per Péter Kovács in augusto 2008 post un longe pausa de multe annos, e durante le passate anno ha apparite cata mense un emission de Radio Interlingua.

Le radio, que on pote ascoltar directemente de www.interlingua.com/radio o discargar como files de MP3, ha devenite immensemente popular. Le prime emission ha essite discargate plus que 6.000 vices, e numerose del altere emissiones ha ultrapassate 2.000 discargas - in ultra del numerose personas, qui los ha ascoltate directemente de Internet. Radio Interlingua assi ha devenite un importante medio de diffusion de interlingua.

Le 13tie emission presenta informativemente e pedagogicamente como participar in le chats in interlingua in scriber e parlar, in le diverse foros de discussiones in interlingua etc., e Péter Kovács interviewa Lars Rosenmeier de Danmark, qui in junio aperiva le nove foro Interforo como un foro de discussion directemente trovabile e usabile in Internet.

Como sempre il ha multe musica in le emission, que iste vice dura 31 minutas.

Lege anque:
 Musica e interviews in Radio Interlingua (2009-07-21)
Interview in interlingua con puero de 2 annos (2009-06-10)
Interview con le historico (2009-03-02)
Jocos, musica e interview in Radio Interlingua (2009-02-14)
Milles ascolta Radio Interlingua (2009-01-24)
Nove programma de Radio Interlingua (2009-01-18)
Maestro de parolas in Radio Interlingua (2008-12-08)
Nove programma de Radio Interlingua (2008-11-07)
Nove emission de Radio Interlingua (2008-09-15)
Radio Interlingua retorna (2008-08-17)