Interlingua como medio de communication international es bon economia, scribe le ex-presidente del UMI in un nove libro del casa editorial Springer.

  "Interlingua es un medio de communication inter parlatores de differente linguas native. Si illo es vastemente adoptate pro iste scopo, illo poterea haber obvie avantages economic."

Assi es le situation que Leland B. Yeager describe in un articulo de 11 paginas in un nove libro, publicate per le filial in New York, SUA, del grande casa editorial german Springer.

Leland B. Yeager esseva inter 1993 e 1999 le presidente del Union Mundial pro Interlingua (UMI). Ille es professor emerite de economia e ha publicate numerose articulos super iste thema.

Multe informationes de interlingua

Le articulo, "A Language Bridge between Peoples and Disciplines" (Un lingua ponte inter populos e disciplinas) es publicate in le libro "Political Economy, Linguistics and Culture - Crossing Bridges" (Economic Politic, Linguistica e Cultura - Cruciante Pontes) - le quinte volumine in le serie Le Hereditage Europee in Economia e le Scientias Social. Le libro de 252 paginas es redigite per Jürgen G. Backhaus del Universitate de Erfurt in Germania.

Leland B. Yeager describe le historia de interlingua, su avantages, explica proque illo non es un lingua artificial ma un lingua vivente, mentiona le Union Mundial pro Interlingua e su sito in Internet, www.interlingua.com, e sublinea le internationalitate e neutralitate de interlingua comprensibile a prime vista. Ille anque explica, como interlingua pote esser usate in parlar e in scripto in le communication con parlatores de linguas romanic qui non ha jammais mesmo audite de interlingua antea, e como interlingua es de grande valor, quando on studia altere linguas.

Un lingua complete

"Io pote testificar de experientia personal que durante que interlingua es multo plus facile a apprender que ulle lingua national, illo functiona como un lingua complete. Io ha legite in illo e scribite in illo desde le publication de su documentos basic in 1951 (e mesmo antea, pois que io cognosceva alcun membros del equipa de recercas de IALA e lor versiones preliminar del lingua). Io attendeva omne le conferentias biennal del Union Mundial pro Interlingua de 1985 a 1997. A iste conferentias le participantes vive durante un septimana parlante solmente (o quasi solmente) interlingua - in sessiones formal (a vices includente debattos spontanee agitate), in sessiones social, in conversationes casual e in excursiones touristic. Il es reassurante observar como relativemente nove recrutas rapidemente developpa capacitates conversational in le lingua," ille conclude in su articulo.

Illo articulo presenta un ample biographia, un appendice con specimenes in esperanto comparate con interlingua, un presentation del vocabulario international in linguas est-europee e del vocabulario international in anglese - omnes con numerose exemplos in interlingua.