Le sexte emission del popular Radio Interlingua es preste - iste vice con un contento multo alternative.

  Le sexte emission de Radio Interlingua, ora publicate, es plen de jocos.

Como sempre le redactor del radio, Péter Kovács de Hungaria, ha succedite colliger un serie de voces pro contribuer al programma que iste vice dura 28 minutas, inclusive musica. Iste vice le redactor ha assemblate le voces de Giovanni Nappi de Italia, Alberto Mardegan (le administrator del UMI), un certe e multo jocose professor Ranto Espe e, in fin, le representante hungare de interlingua, Ferenc Jeszenszky.

In le prime parte del emission, il ha burlas, aphorismos e on tracta le grande questiones del vita. Le secunde parte es le continuation del interview con Ferenc Jeszenszky, cuje prime parte on poteva ascoltar in le emission de decembre.

Radio Interlingua ha in breve tempore devenite multo popular. Tres del emissiones anterior ha ja essite discargate plus que 1.000 vices, le prime de augusto 2008 mesmo plus que 1.500 vices.

Radio Interlingua recomenciava in augusto 2008 post quasi dece annos. Illo presenta nove programmas circa cata mense con interviews, novas, musica etc., toto in interlingua, assi que on pote audir como interlingua es un lingua in plen flor e multo vivente, gratias al multe voces qui participa in le labor.

Le adresse directe de Radio Interlingua es www.interlingua.com/radio. Ci on pote ascoltar o discargar anque le altere emissiones del Radio Interlingua.

Lege anque:
 Milles ascolta Radio Interlingua (2009-01-24)
Nove programma de Radio Interlingua (2009-01-18)
Maestro de parolas in Radio Interlingua (2008-12-08)
Nove programma de Radio Interlingua (2008-11-07)
Nove emission de Radio Interlingua (2008-09-15)
Radio Interlingua retorna (2008-08-17)