Litteratura ric in interlingua
Le litteratura in interlingua es ric e se developpa sempre con nove titulos. Un nove casa editorial adjuta al diffusion. Photo: Thomas Breinstrup

Non solmente le Servicio de Libros UMI pote livrar un large collection de libros in interlingua. Recentemente Lulu.com ha publicate multe nove libros in interlingua, e un bibliotheca electronic con e-libros gratuite es sub construction in www.interlingua.com pro diffunder interlingua in tote le mundo.

UMI  Numerose libros in interlingua ha recentemente essite publicate assi augmentante le litteratura in interlingua, e nove titulos es in via - sur papiro e electronicamente.

Le Servicio de Libros UMI remane le casa editorial del Union Mundial pro Interlingua (UMI), ubi on pote comprar un large collection de titulos in e super interlingua. Gratias a un contribution generose de Piet Cleij, le nederlandese vice-secretario del UMI, tote le stock de libros del Servicio de Libros UMI es ora le possession del UMI; antea le Servicio de Libros UMI esseva le interprisa de Frits Goudkuil, le imprimitor professional, qui establiva le Servicio de Libros in 1972. Le nove position significa que hodie tote le vendita de libros per le Servicio de Libros UMI es supporto directe al labor de diffunder interlingua, proque tote le moneta del vendita va in le cassa del UMI.

Un grande vendita assi es essential pro poter facer plus de reclamo pro le publicationes e assi assecurar que plus de personas cognosce del litteratura e compra le libros. Pro isto, le UMI incoragia omnes a adjutar per facer reclamo pro le publicationes in interlingua per le Servicio de Libros UMI.

Lulu.com publica anque libros
Un serie de nove libros ha essite publicate per Lulu.com, un servicio de publication trovate in Internet. Lulu.com non es un concurrente al Servicio de Libros ma supplementa le litteratura in interlingua. Lulu.com offere a autores publicar libros in parve quantitates, assi que le costos initial de publicar los non es si grande. Isto ha le avantage que on pote sempre actualisar le contento del libro, si on lo desira.

Lulu.com ha su proprie boteca in Internet, ubi on pote ordinar e pagar pro le libros que alora es expedite immediatemente. Le lista de publicationes in interlingua per Lulu.com continua crescer. Pro isto, il vale le pena visitar e le Servicio de Libros UMI e Lulu.com, quando on cerca litteratura in interlingua. Pro facilitar le visita a Lulu.com, cuje motor a cercar non es ancora si precise, on pote ir al adresse www.interlingua.com/lulu. Ci on va esser dirigite directemente al publicationes in interlingua.

E-libros gratuite in interlingua
Le UMI developpa un bibliotheca electronic in interlingua con e-libros gratuite in interlingua. Illos pote esser discargate e legite sur le schermo (o imprimite sur papiro) al adresse www.interlingua.com/e-libros. Alcun e-libros in le bibliotheca es supplementate per audio, assi que on pote audir le textos legite per voce.

Le litteratura in interlingua comprehende belletristica e litteratura professional, obras traducite e original. Le numero es si grande que le bibliothecas danese in 1998 introduceva duo nove gruppos in su systema comprehensive de catalogisation de libros, "Interlingua" e "Belletristica in interlingua".