Le UMI invita tote le familia al 18ve conferentia international de interlingua vicin a Frankfurt le 25 de julio al 1 de augusto 2009.

UMI  Le proxime conferentia international de interlingua essera arrangiate vicin a Frankfurt le 25 de julio al 1 de augusto 2009. On pote inscriber se immediatemente.

FACTOS DE KIRCHHEIMBOLANDEN

Conferentia 2009• Kirchheimbolanden es un parve urbe con circa 8.400 habitantes, situate circa al medio inter le centro technologic Kaiserslautern e le urbe universitari Mainz, directemente al "Strata Imperial" (Kaiserstraße) de Napoleon.
• Le connexiones traffical es optimal. Il essera facile attinger le urbe per avion, traino o auto.
• Kirchheimbolanden ha un centro medieval e assi es plen de historia. Inter plure visitatores famose esseva le compositor Wolfgang Amadeus Mozart, qui sonava in 1778 le organo in le ecclesia. Le castello ancian es situate al montania Donnersberg, 687 metros alte.
• Lege plus (in germano, anglese e francese) del urbe in www.kirchheimbolanden.de

Conferentia 2009Le parve urbe Kirchheimbolanden, a 80 km sudwest de Frankfurt am Main, essera le centro del mundo de interlingua durante un tote septimana, quando usatores e interessatos se assemblara pro discuter planos de e in, conversar in, intertener se in e simplemente usar interlingua.

Isto essera le 18ve Conferentia International de Interlingua, e assi continua le serie de conferentias. Le 17me esseva arrangiate in Svedia in 2005. Desde 1983, le conferentias ha essite arrangiate omne duo annos in annos impar, ma on non succedeva in tempore trovar un location a un precio rationabile pro le arrangiamento planificate pro 2007, e pro isto on decideva postponer le conferentia a 2009.

Le conferentias de interlingua es pro omne membros del Union Mundial pro Interlingua, que anque es le organisator. Iste vice le arrangiamento practic es in le manos del novemente eligite secretario general, Sven Frank, qui es germano e proponeva facer le conferentia in Germania pro le prime vice. Isto va similemente adjutar le cosa de interlingua in Germania, pois que le conferentias significa bon mention in le pressa e assi crea plus de interesse pro le international lingua auxiliar.

Arrangiamento pro tote le familia
Le inscriptiones comencia ora. Le scheda de inscription es preste pro discargar. Plena lo e invia lo si tosto como possibile pro esser secur de poter reservar le typo de camera desirate.

Le precios de participation va esser inter 295 e 425 euros dependente del sorta de camera que on desira (camera singule, camera duple etc.). Le precio include toto: pernoctation, repastos, excursiones etc.

Conferentia 2009

Le centro conferential desde 1974, CJD Kirchheimbolanden, es un casa de 250 annos de etate con un atmosphera placente e commode. Ci il ha cameras, salas, cameras de labor etc. sub le mesme tecto. Ma previdente que iste conferentia potera attraher multe plus de participantes que il ha cameras, le arrangiatores ha reservate cameras anque in hoteles vicin al centro. Le centro conferential es situate justo vicin al parco del castello.

SCHEDA DE INSCRIPTION

Si tosto como possibile, ma ante le 1 de april 2009, le participantes debe

  • 1. plenar e signar le scheda de inscription sur papiro e inviar lo a:
    Union Mundial pro Interlingua
    Casa de Interlingua
    Le secretario general Sven Frank
    Hauptstraße 99
    D-69469 Weinheim
    Germania
  • 2. pagar le deposito de 60 euros per persona al conto del UMI:
    Conto de banca: Numero IBAN: FI18 1820 3000 0163 29. Numero SWIFT: NDEAFIHH.
    Le resto del pagamento de participation debe esser pagate ante le 1 de junio 2009; un rememoration va esser inviate a omnes qui se inscribe. – Le deposito non es retornate, si on non participa.
Scheda de inscriptionDiscarga le scheda de inscription ci

Le conferentia va poner peso al familia e infantes. On planifica arrangiar un curso special pro le infantes, parallelmente con le curso traditional pro comenciantes e le curso de conversation.

Ma il anque habera activitates pro le membros del familias qui non participa directemente in le sessiones del programma ordinari, ubi on discute planos pro promover interlingua ancora plus e excambia experientias de lo que occurre in le differente paises.

Programma sub preparation
Un comité prepara ora le programma detaliate del conferentia. Illo debe dar assatis de tempore pro le labor ma al mesme tempore assecurar que il ha bon tempore pro conversar, facer nove amicitias, laborar in gruppos, amusar se con musica, cantar e altere intertenimento e ir a excursiones.

Le excursiones planificate comprehende un tote die a Mainz e un medie die con guida in le urbe conferential mesme, Kirchheimbolanden.

Photos de Kirchheimbolanden: Le officio touristic de Kirchheimbolanden. Photos del centro conferential: Donald Gasper.

Conferentia 2009 Conferentia 2009