Interessatos danese pote ora participar in un curso electronic de interlingua – con grammatica e vocabulario.

Lars Rosenmeier, membro del Union Danese pro Interlingua, ha prendite le initiativa al curso que es le prime de su sorta. Le cursistas va practicar le grammatica e apprender nove parolas per exercitios que es corrigite, p.ex. traductiones in interlingua de breve textos in danese (con vocabularios). Le practicar del vocabulos va usar exercitios interactive in Internet, como flashcards. Le curso anque va dar descriptiones de possibilitates de apprender e usar interlingua per le rete.

Le curso es gratuite, ma il es recommendate comprar le dictionario electronic interlingua-danese/danese-interlingua (100 DKK) pro effectivemente poter scriber e-posta e participar in le chat in interlingua que anque es parte del curso.

Pro reciper le prime lection, on debe inviar un message al adresse special del curso. Per favor, scribe alcun parolas super quanto tu cognosce interlingua, e si tu ha antea participate in o legite altere cursos de interlingua.

Le curso es in danese. Assi anque svedeses e norvegianos pote participar, pois que le linguas es multo simile.