Interlingua
Vos ha interesse in communication international in Europa, America del Nord e del Sud, Australia o grande partes de Africa? Vos vole apprender un lingua ma pensa que isto es troppo difficile? Vos trova linguas in general interessante? Considera Interlingua, le instrumento moderne de communication international!
Interlingua es:
 |
Pan-europee. Interlingua usa parolas extrahite del sequente linguas: italiano, espaniol/portugese, francese, anglese, germano e russo. |
 |
Scientific. Interlingua es le resultato de un grande cooperation de linguistas e philologos europee e american. Illes ha extrahite methodicamente le vocabulario international e commun al major linguas europee. |
 |
Natural. Nulle aspecto de Interlingua es artificial o inventate. Omne characteristica es basate in al minus tres linguas de origine europee. Interlingua: simplification sin artificialitate! |
 |
Practic. Milliones comprende interlingua "a prime vista". Specialmente le parlantes del linguas neo-latin comprende Interlingua immediatemente, e quasi sin effortio. Ideal pro vostre viages! |
 |
Facile. Le grammatica de Interlingua es multo uniforme, e le pronunciation del parolas seque regulas stricte e simple. Con Interlingua, nulle listas infinite de exceptiones e irregularitates... Apprender Interlingua es agradabile! |
 |
Pedagogic. Con Interlingua, vos apprende quasi automaticamente multes del parolas "estranier" o "docte" in vostre proprie lingua materne. Interlingua es le base ideal pro vostre studios linguistic ulterior! |
 |
Neutral. Interlingua non es le proprietate de un singule cultura o populo. Nulle parlator native ha un avantage injuste. Parla Interlingua e pone fin al discrimination linguistic. |
 |
"Latino Moderne". Le majoritate de omne parolas international es de origine latin o grec. In Interlingua, iste parolas international prende formas prototypic e standardisate. Le resultato es un "latino moderne" international e simplificate, elegante e practic. |
 |
Divertente. Con Interlingua vos incontra un crescente communitate plen de personas intelligente e original. Nostre conferentias es experientias inoblidabile. Veni e diverte vos con nos! Vos es multo benvenite! |
Version breve
INTERLINGUA es le resultato de un grande cooperation de linguistas europee e american. Interlingua usa multe parolas latin e altere parolas international in le sequente linguas: italiano, espaniol/portugese, francese, anglese, germano e russo. Le grammatica de Interlingua es multo uniforme e facile. Le pronunciation del parolas seque regulas stricte e simple.
 INFORMATION |
| Contacto: Representation e organisationes national de interlingua |
| Film: Hallo, hallo – nos presenta interlingua! |
| Dictionarios e cursos de interlingua |
| Materiales pro studiar interlingua |