Historia de interlingua
Biographias A-Z

Július Tomin

Slovachia
Nascite: le 12 de april 1915
Morite: le 7 de april 2003

Július Tomin, april 1995

Július Tomin (a sinistre) a su 80-esime anniversario le 12 de april 1995. Le gratulante es un ancian studente, primator del urbe Krupina.

Le majoritate del usatores de interlingua non ha essite persequite pro occupar se con le lingua. Ma Július Tomin, ex-representante slovac de interlingua, ha luctate pro su derecto de laborar con e pro interlingua.

Ille nasceva in 1915 durante le Prime Guerra Mundial in le ancian village Nová Ba a (Nove Mina), fundate per colonisatores german. Su nomine original es "Königsberg". Le studios gymnasial de Július Tomin finiva in Slovachia (ille pefere mesme le forma "Slovakia"), ma ille continuava al universitate in Praga, ubi ille habitava 18 annos.

Alcun dies post le invasion sovietic in Tchecoslovachia in augusto 1968 ille recipeva ab le ex-administrator del Union Mundial pro Interlingua, Bent Andersen (Danmark), un littera super interlingua. E desde iste tempore, ille ha laborate pro e in interlingua.

Essente de profession inseniator, il esseva natural que ille copiava le methodo svedese: inseniar interlingua in le gymnasio pro facer le alumnos apprender le vocabulario international e assi comprender lor proprie parolas estranier. Július Tomin practicava durante multe annos interlingua in su gymnasio in le citate Krupina, ubi ille ancora habita, e comenciava le correspondentia inter su classe e illo de fil. mag. Ingvar Stenström a Peder Skrivares Skolan in Varberg, Svedia.

Július Tomin deveniva representante de interlingua pro Tchecoslovachia usque 1988, e post le division del pais in 1993 ille reassumeva le carga como representante slovac, un empleo que ille in le initio de 2000 passava a un bon collega, professor universitari Rastislav Harcarufka, 39 annos a ille tempore.

Su nomine es ben cognite per le slovacos – e tchecos. Július Tomin ha un production admirabile de articulos in jornales, revistas e magazines. Su prime articulo esseva publicate in un revista mensual slovac post su retorno ab le 4-te Conferentia International de Interlingua in Basel, 1971. Ille ha vice post vice demonstrate le fundamento scientific-linguistic que es detra interlingua e provate le grande valores educational del lingua. Ma anque su altere passion – le lucta contra le fumar – le ha portate in le medias, ubi ille ha essite portraitate plure vices.

Ante que le cortina de ferro finalmente cadeva, Július Tomin experientiava litteras anonyme ab esperantistas fanatic con menacias, spiones qui voleva accusar al organos politic que ille vendeva publicationes, e recensentes fanatic qui per omne medios voleva supprimer le informationes super interlingua per misinformar super illo.

Malgrado isto ille continuava su labor con le enthusiasmo, optimismo e energia que es un parte importante del portrait de Július Tomin. Ille ha editate in 1994 le libro "Euro", describente interlingua como le lingua unificante pro Europa. Ille anque ha scribite manuales de interlingua, editate un dictionario interlingua-slovaco (1979) e un grande dictionario slovaco-interlingua (1996), un curso de interlingua pro tchecos e slovacos (1985, secunde edition 1986) e un longe serie – quasi sin fin – de articulos in revistas e jornales. Actualmente (autumno 2000), ille labora a un longe articulo super Alice V. Morris, le fundatrice del International Auxiliary Language Association.

Július Tomin ha quatro filios con su prime sposa. Illa, qui esseva tchec, moriva per un avaria. Un del filios, qui anque se appella Július, participava con le ex-presidente tchec, Vaclav Hável, in le lucta contra le communismo in le famose gruppo de opposition Charta 77. Ille habitava con su secunde sposa, qui es slovac, in Krupina, que ille assi ha ponite sur le mappa mundial como un "centro de fortia".

Július Tomin moriva le 7 de april 2003 in le etate de 87 annos post haber habite un sanitate pejorante durante un periodo.

Revidite: 2006-12-29

Cerca le Historia de interlingua per FreeFind

LEGE ANQUE...
Persecutate pro parlar interlingua

Information con obstaculos in Tchecoslovachia
FACTOS
Vaclav Havel nasceva in 1935. Ille es dramatista, poeta e presidente del Republica Tchec desde 1989. Durante le primavera de Praga 1986 ille se ingagiava intensivemente in le Club del Autores Independente. Le anno sequente le governamento le prohibiva a laborar e publicar. Su pecias dramatic poteva esser presentate solmente al estraniero. Havel esseva un del initiatores del movimento pro derectos civil Charta 77, in le qual participava etiam dr. Július Tomin, filio de Július Tomin. Ille esseva condemnate plure vices pro "activitate antistatal".