|
|
 |
Franske Persijn-Jorritsma
Nederland
Nascite: 24 de augusto 1927
Morite: 22 de augusto 2019
 Franske
Persijn-Jorritsma esseva le energic tresorera del Societate
Interlingua-Nederland desde 1994 e un estimate participante in le labor
de interlingua e le conferentia international.
Illa nasceva in
Utrecht le 24 de augusto 1927 como le plus juvene de cinque pueras. Su
patre esseva un successose functionario postal, qui esseva inviate a
officios in tote le pais. Franske visitava scholas in differente
citates e esseva un discipulo con forte interesse pro linguas e
litteratura, specialmente poesia. Post finir le schola, illa laborava
in le bibliotheca public in Utrecht in 1945, ma quando su patre in 1947
deveniva director del officio postal in Sneek, illa anque cambiava al
bibliotheca ci.
In le estate calide de 1947 illa incontrava su sposo futur, Jan Persijn,
qui studiava chimia al Universitate Technic de Delft, ma durante le
estate ille habitava con su parentes in Sneek. A causa del temperaturas
altissime, ille non poteva studiar in casa e rememorava le camera de
studios al bibliotheca. La ille videva un puera bellette in roba jalne
e con un nigre banda villute in le capillos - le initio de quasi 70
annos de relationes e, como un miraculo, non le fin del studios
universitari. Illes se maritava in 1951, un mense post que Jan Persijn
comenciava laborar in un firma chimic in Rotterdam.
Le prime
filia nasceva un mense ante le inundation terribile in le sud-west de
Nederland in 1953. Ancora duo filias nasceva, e octo annos postea le
ultime puera veniva – al surprisa del copula – un filio.
Franske
Persijn-Jorritsma remaneva in casa, durante que le infantes esseva
parve. Illa sequeva cursos del lingua frisian, deveniva un
actor-amateur e studiava recitation. Quando le pueras iva a schola, le
familia habitava in Apeldoorn, e Franske Persijn-Jorritsma comenciava
recitar libros pro registration sur bandas pro personas qui non pote
leger libros. Un "cliente" esseva su patre, qui poco a poco perdeva su
vista.
In 1965 Jan Persijn acceptava un empleo in un compania
de papiro. Ille gereva un parve gruppo de specialistas, deveniva chef
del division technic e, in fin, chef del laboratorio de recercas e
developpamento. Al etate de 54 annos, ille perdeva su empleo in 1980 e
comenciava su proprie, parve compania de exportation pro 12 annos.
Franske esseva responsabile del administration total e imballava omne
le merces. In 1992 illes vendeva le firma crescente e se retirava.
Franske
Persijn-Jorritsma remaneva active in affaires ecclesiastic, puzzles,
esseva un specialista de cryptogrammas e legeva multo. Su interesse pro
interlingua esseva evocate per Frits Goudkuil, gerente del Servicio de Libros UMI. In 1989 illa attendeva le 9e conferentia international de interlingua in Zwolle.
Le
hobby de Jan Persijn esseva le harmonica chromatic in combination con
computator e claviero electronic. Le copula ha numerose vices
intertenite al conferentias de interlingua - con musica e con
recitationes. Franske Persijn-Jorritsma ha traducite plure cantos in
interlingua, hodie includite in le "Cantario de interlingua".
Illa continuava assister per paccar e expedir le magazin del Union Mundial pro Interlingua, Panorama in interlingua, quando illo esseva imprimite in Nederland presso le imprimeria de Frits Goudkuil.
Illa
appreciava multo le poesia, e usque le fin de su vita illa esseva
membro de un parve gruppo, que includeva su filia le plus grande
Marijke, e in le qual on legeva poemas le unes pro le alteres. In le
fin, le gruppo veniva a su casa, proque illa non poteva plus ir mesme.
Ma illa remaneva clar in su capite.
Franske Persijn-Jorritsma moriva duo dies ante que illa habeva 92 annos, quando su familia amate haberea debite celebrar la.
|
|
|
