Robert Austerlitz

Statos Unite de America
Nascite: 13 de decembre 1923 - 9 de octobre 1994

Professor Robert Austerlitz, consiliero del Interlingua Institute american ab 1975 a su morte in 1994, nasceva in Bucarest, Romania, in 1923 de un patre austriac e un matre qui esseva citatano american. Ille emigrava al SUA in 1938 e iva al Stuyvesant High School. Pois,  ille studiava a New York University, Loyola University (New Orleans), e New School for Social Research (BA, 1950). Ille studiava linguistica a Columbia University (sub le professor André Martinet) e recipeva le grado MA (Magister Artium) in junio 1950.

Con supporto ab le Ford Foundation ille studiava linguas uralic e altaic al Universitate de Helsinki in 1951-1953 e al Universitate de Tokyo 1953-1954. Ci ille faceva studios practic del lingua siberian gilyak in Hokkaido in le nord de Japon.

In decembre 1955 ille recipeva su doctorato (PhD) ab le Departimento de Linguas Uralic e Altaic al Columbia University. Pois ille retornava a Japon pro studiar durante duo annos le linguas gilyak, orok e ainu in practica, de novo supportate per le Ford Foundation e le Societate Philosophic American. Ille anque recercava in Finlandia gratias al supporto ab le New York Botanical Gardens.

In 1958, Robert Austerlitz deveniva professor assistente de studios linguistic e uralic al Columbia University e professor associate in 1962-1965. Inter 1960 e 1965 ille esseva co-redactor (con Uriel Weinreich, William Diver e André Martinet) del jornal Word, le organo del Circulo Linguistic de New York.

Robert Austerlitz deveniva in 1965 professor de studios linguistic e uralic a Columbia University e - pro le sequente tres annos - esseva presidente del Departimento de Linguistica. In le primavera de 1965 ille recercava in linguistica hungare como invitato del Instituto pro Relationes Cultural in Budapest, Hungaria, gratias a supporto ab le Inter-University Committee on Travel Grants (al Indiana University).

In 1969 ille deveniva Equite, Prime Classe, Ordine del Leon de Finlandia "pro contributiones al philologia finno-ugric".

Ille deveniva professor visitante al universitates Yale, California (Berkeley), le Instituto Linguistic del Societate Linguistic de America a Ohio State (Columbus) e Colorado (Boulder). Ille anque esseva professor visitante al universitates in Washington, Hawaii, Colonia e Helsinki. In 1971-1972 ille recercava in Finlandia e in 1975 al Universitate de Hawaii in Manoa, Honolulu.

Robert Austerlitz entrava como consiliero del Interlingua Institute in le autumno de 1975.

In 1990 ille esseva presidente del Linguistic Society of America. Robert Austerlitz esseva membro del Academia Finnese de Scientias, del Academia Hungare de Scientias e del Academia American del Artes e del Scientias. Durante le estate 1994, brevemente ante su morte, ille recipeva le doctorato honoris causa ex le universitate de Helsinki.

Su sposa, Sylvi Nevanlinna, moriva poco ante ille mesme.

Inter su publicationes es "Finnish reader and glossary", Bloomington, Indiana University, 1963 (XV + 294 pp. in le serie Uralic e Altaic), "Ob-Ugric metrics; the metrical structure of Ostyak and Vogul folk-poetry", Helsinki, Suomalainen Tiedeakatemia, 1958 (128 pp. in le serie FF communications, edited for the Folklore Fellows, vol. LXX2, no. 174), e "Readings in linguistics II, edited by Eric P. Hamp, Fred W. Householder and Robert Austerlitz", Chicago, University of Chicago Press, 1966 (X + 395 pp., Intended to follow Readings in linguistics, edited by Martin Joos, 1958, for the ACLS Committee on Language Programs).

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua