Passivo
§112
Le verbo auxiliar del PASSIVO es esser. Le formas temporal de iste verbo auxiliar es completemente coperite per le discussion precedente del conjugation verbal. Le sequente summario de iste formas pote esser trovate conveniente.
| tempores simple de 'esser' |
|---|
| io es ... | |
| io esseva ... | (= era) |
| io essera ... | (= va esser) |
| io esserea ... | (= velle esser) |
| tempores perfecte de 'esser' |
|---|
| io ha essite ... | |
| io habeva essite ... | |
| io habera essite ... | (= va haber essite) |
| io haberea essite ... | (= velle haber essite) |
Le formas passive complete consiste del verbo auxiliar esser sequite per un participio passate.
| tempores simple passive (esser (simple) + pp) |
|---|
| Ille es surveliate per le policia. | |
| Ille esseva surveliate per le policia. | (= era) |
| Ille essera surveliate per le policia. | (= va esser) |
| Ille esserea surveliate per le policia. | (= velle esser) |
| tempores perfecte passive (esser (perfecte) + pp) |
|---|
| Ille ha essite surveliate per le policia. | |
| Ille habeva essite surveliate per le policia. | |
| Ille habera essite surveliate per le policia. | (= va haber essite) |
| Ille haberea essite surveliate per le policia. | (= velle haber essite) |
§113
Le infinitivos passive e participios passive similarmente se compone del infinitivo e participio del verbo auxiliar con le participio passate del verbo principal que seque:
| esser surveliate | [infinitivo passive] |
| essente surveliate | [participio presente passive] |
| essite surveliate | [participio passate passive] |
Nota que le passivo sol non pote esser distinguite de un forma de esser con un adjectivo participial.
Io es maritate
pote significar "Io es maritate (action/passivo)" e "Io es maritate (condition/adjectivo)."
§114
Le functiones del passivo es le mesme como in anglese. Nota, totevia, le uso del reflexivo in loco de un passivo anglese. Vide §68 supra. De plus un passivo anglese pote sovente esser rendite per un construction impersonal con on, como in
On non nos ama hic: Nos non es amate hic.