Cata mense un libro del litteratura de interlingua essera recommendate. Isto non necessarimente es un nove titulo, illo pote esser prendite del ric litteratura. Tote le libros pote esser comprate del Servicio de Libros ci in www.interlingua.com, e on pote pagar directemente per carta de credito. Visita le Servicio de Libros.

Sonios con appetito


"Le casa del sonios" es un titulo popular in interlingua. Detra le pseudonymo A.Petit se celava Frits Goudkuil. Erik Enfors recense le libro con nove appetito.

Per Erik Enfors
vice-secretario del Societate Svedese pro Interlingua


Le prime libro belletristic primarimente publicate in interlingua, "Le casa del sonios" (ISBN 90-71196-27-5), esseva scribite per Frits Goudkuil (1917-2007). Le libro ha 115 paginas con lectura multo captivante. Compra lo ci.

Como autor Goudkuil usava le pseudonymo A. Petit, lo que tamben esseva le nomine del personage principal del libro. Dunque on forsan pote supponer que ille ipse ha experientiate alcunes del eventos mentionate in le libro, ma isto es mi proprie presumption.

Le nomine del libro depende de certe eventos supernatural concernente le casa a ubi le familia se installava. Le patre de Albert Petit multe vices habeva soniate re un casa blanc e un die ille discoperiva un casa que exactemente similava al casa in su sonios. Post alcun tempore ille habeva opportunitate de comprar le casa gratias a coincidentias felice e le familia se installava ibi.

In le libro es describite le problemas que pote incontrar un infante quando ille comencia in un schola in un nove pais, lo que hodie es equalmente actual pro multe infantes. Le nomine del puero, A. Petit, resultava in risadas inter le cameradas del schola nederlandese quando ille le prime vice lo scribeva sur le tabula nigre. Le causa esseva que le nomine francese in nederlandese poteva esser percipite como "tetta de simia".

On debe saper que le eventos occurreva in Nederland ante e durante le Secunde Guerra Mundial lo que ha grande importantia pro le historia e causava aventuras captivante in le incontros con le nazistas. Dunque le libro in plus es un bon documento interessante de iste periodo historic. In le fin del libro occurre un evento multo dramatic quando un tumulto, que esseva initiate per opiniones politic differente, finiva con un accidente ubi un camerada esseva pungite in le pectore con un pugnal.

Si tu non ha legite iste libro, lege lo, e da alcun pensatas al autor!

  • A. Petit: "Le casa del sonios" costa 8 euros. Ordina lo ci (e paga directemente per carta de credito).