Un equipa international forma le direction quotidian del Union Mundial pro Interlingua (UMI). Le Consilio de Administration es responsabile pro le functiones quotidian e strategic del UMI.

Le Union Mundial pro Interlingua es un organisation international, sin scopos lucrative, pro promover e diffunder le lingua auxiliar international interlingua, publicate in 1951 per le "International Auxiliary Language Association" (IALA). Tote le labor in le Consilio de Administration – como in tote le organisation del Union Mundial pro Interlingua – assi es facite sin salario.

Le UMI esseva fundate le 28 de julio 1955 in Tours, Francia, e esseva registrate juridicamente al subprefectura de Étampes, Francia, le 3 de augusto 2006.

Le UMI como organisation non prende positiones super questiones religiose, politic o scientific, ni super ulle altere questiones, con le exception de appoiar e divulgar interlingua. Iste sito offere un selection de documentos in e super interlingua, ma solmente lor autores es responsabile pro lor contentos.

Presentation del Consilio Executive del UMI

Presidente:
Madeleine Mahé (nascite 1947), Francia. Presidente desde le 1 de januario 2019. Professor de musica, ora pensionate, e secretaria del Union Interlinguista de Francia (UIF). Con su grande soror, Alix Mahé-Potet, qui la precedeva como presidente (2015-2018), illa ha participate in le labor de interlingua durante decennios. Le familia anque esseva le arrangiatores in chef del 8ve conferentia international de interlingua in Paris in 1987 e del 13tie conferentia international de interlingua in Strasbourg in 1997, e Madeleine Mahé ha plure vices essite professor del cursos de interlingua durante le conferentias.

Secretario general:
Julian Mendez (nascite 1973), Argentina ma habitante in Germania. Secretario general del UMI desde le 1 de octobre 2014. Argentino de nascentia. Faceva su studios de Maestro in Logica Computational in le Libere Universitate de Bolzano-Bozen (Italia), pois in le Universitate Technic de Dresden (Germania) e actualmente face su doctorato in le Universitate de Umeå (Svedia). Julian Mendez es architecto e disveloppator de software e labora in Logicas de Description. Ille parla interlingua, anglese, espaniol, italiano e apprende germano e es co-administrator del Wikipedia in interlingua.

Vice-secretario:
Martijn Dekker (nascite 1974), Nederland. Vice-secretario del UMI desde le 15 de septembre 2009. Administrator de systemas computatorial. Active con interlingua desde 2000. Ha traducite software, paginas de Internet, scriptura e redaction de articulos in le encyclopedia libere Wikipedia in interlingua e ha presentate discursos e seminarios in interlingua super themas sin connexion a interlingua a publicos international. Ha participate in numerose conferentias international de interlingua e incontros nordic de interlingua.

Tresorero/aranea:
Alberto Mardegan (nascite 1978), Italia. Tresorero e aranea de www.interlingua.com desde le 1 de januario 2006. Cofundator e prime presidente del organisation Interlingua Italia, establite le 15 de januario 2005. Desde 2003 le representante de interlingua in Italia. Interessato de interlingua desde 2002. Parla italiano, anglese e bulgaro. Frequentava le schola obligatori, pois le lyceo scientific Leonardo da Vinci in Treviso (exiente con un evalutation de 56/60) e alora al universitate de Padova studiante al facultate de mathematica pur e applicate. Su these de laurea esseva scribite in interlingua e esseva evalutate a 105/110, facente le doctor de mathematica. Quasi immediatemente post le fin del universitate empleate como programmator in Sogea, un firma in Treviso que produce software pro interprisas. Desde septembre 2006 a 2011 empleato presso Nokia in Finlandia. Pois programmator freelance pro Ubuntu.

Redactor de Panorama:
Thomas Breinstrup (nascite 1965), jornalista, Danmark. Redactor del magazin international de novas, Panorama in interlingua, desde su fundation in 1988. Consiliero del Union Danese pro Interlingua (DIU) desde 1981 e presidente del DIU desde 2013. Consiliero general del UMI pro Danmark 1982-2022. Autor de numerose obras in e super interlingua e ha participate in omne conferentias international de interlingua desde 1983 e in le incontros nordic de interlingua desde le initio in 1988. Jornalista a Berlingske, le quotidiano matitutinal le secunde plus grande in Danmark, coperiente technologia e telecommunication.

Consiliero ordinari:
Barbara Rubinstein (nascite 1954), epidemiologo, Svedia. Predidente del Societate Svedese pro Interlingua 2012-2018 e de novo desde 2022. Presidente del Union Mundial pro Interlingua (UMI) inter 2001 e 2010 e desde alora supporto al gerentia del UMI. Active participante in omne conferentias international de interlingua e incontros nordic de interlingua. Doctor de odontologia, ha inseniate al facultate de odontologia del Universitate de Göteborg, ubi illa habita, e labora como epidemiologo in le region Västra Götaland.

Associatos distinguite del UMI

Le associatos distinguite supporta interlingua e le labor que le UMI face.

  • James M. Buchanan, SUA (1919-2013, professor, receptor del Premio de Nobel in scientia economic in 1986), appunctate in 1990
  • Giovanni Blandino, Italia (1923-2011, professor universitari, philosopho e autor), appunctate in 1991
  • André Martinet, Francia (1908-1999, professor de linguistica), appunctate in 1998
  • Jeanne Martinet, Francia (1920-2018), professor de linguistica, appunctate in 2009