Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

J A N U A R I O ,   1 9 9 9
Le Euro ha nascite con le anno nove

Traducite de Tribuna da Europa per Ensjo.

Le 1me de januario de 1999 restara in le historia de Europa como le die del nascentia del euro. Alcun horas ante le final de 1998 le Ministros del Financias del dece-un ha fixate finalmente taxas de conversion definitive inter le euro e le monetas national de Portugal, Espania, Francia, Germania, Belgica, Paises Basse, Luxemburg, Austria, Italia, Irlanda e Finlandia, le dece-un Statos-membros que se ha qualificate desde ora pro le passage al moneta unic (e a illo ha volite adherer, perque Regno Unite e Danmark tamben lo poterea haber facite, si illos lo haberea desirate.)

A partir de ora, le euro habera existentia financiar, mais ancora non essera in le portamonetas del europeos, continuante in circulation le monetas del dece-un paises.

In le practica, le citatanos potera facer operationes financiari in euros, realizar pagamentos in euro per cheque o carta de credito, haber contos in euro, mais continuara a usar le notas e le monetas national in le quotidiano. In 1me de januario de 2002, le notas e monetas in euro essera mittite in circulation, coexistente con le monetas e notas national usque 30 de junio de 2002, quando illos debera esser completemente foras de circulation. O sia, le citatanos del paises membros del euro habera tres annos pro habituar se a lor nove moneta. Si initialmente illo potera parer alco confuse, bastara al lector pensar in como essera multo plus facile, in un dislocamento al estraniero, comparar le precio de qualcunque ben o producto con le precio in vigor in su pais natal per referer se al euro. Pro isto, es importante que se disveloppa desde ja le duple exhibition de precios (in le moneta national e in euros), que permittera un adaptation gradual del citatanos al nove moneta.

Le nascentia del moneta unic representa le concretization de un sonio de plus que trenta annos. Ja in 1970, le assi-nominate plano Werner traciava le cammino pro le creation de un union monetari in le termino de 10 annos. In 1979, nasceva le systema monetari europee, dotate de un mechanismo de controlo del cambios que limitava le margines de fluctuation del monetas national participantes.

In april de 1989, le alora Presidente del Commission Jacques Delors ha presentate un plano in tres phases pro realizar le moneta unic. Iste plano ha essite concretizate in le Summitate de Maastricht, de 1991, que ha date origine al Tractato de mesme nomine: le alora dece-duo prevideva que le moneta unic nascerea in 1me de januario de 1997, si le majoritate de illos plenarea alora le assi-nominate criterios de convergentia, o, le plus tarde, in 1me de januario de 1999, malgrado le numero de paises qualificate. In 1me de januario de 1994 nasceva le Instituto Monetari Europee, embryon del Banca Central Europee, que habera le labor de definir le politica monetari pro tote le conjuncto del euro. In decembre de 1995, in Madrid, le Dece-cinque ha baptizate le futur moneta commun como euro. In decembre de 1996, in Dublin, illos ha approbate le famose “pacto de stabilitate”, que pretende mantener le eventual glissamentos budgetari del futur membros del moneta unic sub stricte controlo.

In ille tempores, le “credentes” in le realization del plano esseva quasi scopo del derision del euroscepticos e del criticos eventual, qui non hesitava in catalogar como absurde lor conviction. Le responsa ha arrivate in 2 de maio de 1998: post un session historic del PE, le Chefs de Stato e de Governamento del Dece-cinque ha definite qual esserea le (dece-un) paises que integrara le tertie phase e ha seligite Wim Duisenberg pro prime presidente del Banca Central Europee. E a 1me de januario de 1999 le euro ha devenite realitate.


Initio Alto