Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

N O V E M B R E ,   1 9 9 8
Compromisso polonese de junger se al UE reaffirmate

Traducite de EP News (Irlanda) per Stan Mulaik.

In reaffirmar su compromisso con le adhesion polonese al UE durante su discurso a europarlamentarios a Strasbourg in novembre, le Presidente Polonese Aleksandr Kwasniewski argueva que allargamento non conducerea a un destabilization del mercatos agricole europee. Ille respondeva a lo que ille credeva esser un “anxietate excessive e, in grande parte, injustificate” quanto al effectos del adhesion de Polonia al Union Europee super le Politica Agricultural Commun. Sr. Kwasniewski contendeva que mesmo un augmento de 30 per cento in le production agricole de Polonia — que representarea simplemente un retorno al nivello de production de 1989 — haberea solmente un impacto insignificante super le nivello de precios del productos agricole in le UE.

In su discurso le Presidente polonese assumeva un attitude optimistic. Su pais, ille diceva, se ha beneficiate de un del plus grande grados de crescimento in Europa desde 1993. Illo mobiliza investimentos substantial pro adjutar le protection del ambiente natural que amonta usque a quasi 10 per cento de tote le investimentos in le economia polonese e 1,7 per cento del recepta national — indices que es plus alte que in le majoritate de statos membros. Ille equalmente videva pauc ration proque le accession polonese resultarea in un efluxo in massa de poloneses a lor vicinos UE. De facto le abolition de requirementos de visas pro cititanos polonese habeva essite sequite per plus de poloneses retornante a polonia que quittante lo. Le disoccupation esseva plus basse que le medio UE e le poloneses esseva capace de satisfacer lor aspirationes material sin emigrar.

Consequentemente, Sr. Kwasniewski concludeva que Polonia esserea completemente preste a adherer al UE al fin de 2002 e que su adhesion esseva appoiate trans le spectro politic integre. Le accession polonese darea un impeto significante al stabilitate politic e economic in Europa e fortificarea le argumentos in favor de cambios interne in le UE. Iste cambios, ille diceva, es vital si le UE esseva a devenir un corpore effective e competitive in le 21me seculo. Ille consequentemente adverteva contra statos membros currente decelerante le processo de allargamento. Ille vole que le processo eventualmente se extende a altere paises europee trans le prime unda de candidatos, e a includer eventualmente statos como le Ucrania, Moldavia e le previe republica yugoslave, Macedonia. Le grande projecto europee non debe abandonar alcuno justo al initio.

“Polonia non debe ‘retornar’ a Europa,” concludeva Sr. Krasniewski, arguente que illo ha essite in le circulo del civilization occidental desde plus que dece seculos. Illo ha un systema parlamentari que se originava in le 14te e 15te seculos, e illo vole esser un parte de un Europa que pro poloneses significa “democratia, libertate, attitude critic, tolerantia ... con un recognition del equalitate de culturas. Durante le annos e decados passate,” ille diceva, “le politicos europee ha manifestate lor spirito visionari in prender decisiones que construeva le unitate de lor continente.” Ille esseva convincite que iste vice il equalmente esserea le caso.


Initio Alto