Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

O U T U B R O ,   1 9 9 8
Discoperir le Europa real

Traducite de EP News (Irlanda) per Stan Mulaik.

In julio de iste anno le Parlamento dava su approbation al Servicio Voluntari Europee (SVE). Le accordo resolve un lucta longe del europarlamentarios pro adjutar le juvenes a participar activemente in le communitate.

Le tractatos del UE non lo provide poteres specific in iste area de politica de juvenes. Totevia, le Parlamento ha appoiate numerose propositiones pro accrescer le participation de juvenes in le vita del Communitate e a accrescer le opportunitates que on pote offerer a illes a un nivello europee.

In 1991 Luciano Vecchi (I, PSE) argueva que “tote effortio debe esser facite pro render possibile que le juvenes se transforma gradualmente de esser le ‘objectos’ del mesuras del UE verso esser le ‘subjectos’ qui participa in le decisiones que les affecta. Illes debe esser involvite in le construction del Communitate e de Europa a un nivello strategic e spiritual e super un base positive e quotidian.”

In le prime annos del 1990s il deveniva apparente que il habeva un forte sentimento in favor de un servicio voluntari transeuropee. In 1995 europarlamentarios exhortava le Commission a establir un “servicio voluntari europee e a crear un stato legal special pro voluntarios.” In 1996 le schema commenciava a prender forma quando le Parlamento disponibilizava fundos pro un serie de projectos experimental pro juvenes.

Iste projectos functionava in 1996 e 1997 como un precursor del Servicio Voluntari Europee e ha rendite possibile que circa 2500 individuos exequeva travalios communitari voluntari con 1000 organizationes local. Iste projectos experimental ha essite considerate generalmente ben-succedite, con un nivello significante de interesse in tote le statos membros de juvenes e de organizationes interessate in patronar le voluntarios.

Illos ha equalmente providite un opportunitate importante pro provar un nove modello de implementation decentralizate basate super un rete de structuras national que organiza le programma a un nivello local. Le nove programma ha extracte principios de iste experimentos.

Su detalios principal es:

  • illo es aperite a tote juvenes inter 18 a 25 annos qui reside legalmente in un pais del UE o Norvegia o Islandia. Il ha necun preconditiones in terminos de nationalitate, qualificationes o fundo social. “Le unic condition,” diceva un voluntario, “es esser motivate.” Illo es equalmente extendite a paises de Europa Central e Oriental, e eventualmente paises del America Latin e paises asiatic poterea participar.

  • le participantes travalia in projectos que dura inter 6 e 12 menses;

  • le voluntarios viagia a un altere pais ubi illes travalia super schemas que contribue al ben esser del communitate local in campos como le assistentia social, protection ambiental, activitates artistic o cultural o combatto contra le drogas;

  • le voluntarios recipe alimento e allogiamento e alcun moneta in tasca;

  • le assistentia amonta usque a 50 per cento pro projectos in le UE, excepte projectos involvente juvenes disavantagiate ubi le assistantia pote esser plus alte. Le resto es pagate per le organizationes que patrona e invia le voluntarios, tal como autoritates local de organizationes voluntari e de caritate.

In addition a iste activitates le SVE equalmente va includer:

  • breve projectos de inter tres septimanas e tres menses, generalmente involvente gruppos multinational de voluntarios travaliante super un projecto commun;

  • parve subventiones pro voluntarios reveniente que les adjuta in establir lor proprie projectos basate super le experientias ganiate;

  • projectos multilateral que mitte in contacto participantes de al minus quatro paises;

  • disveloppamento de projectos del SVE con tertie paises.

Le programma currente va terminar se in decembre 1999 mais le plano provide que le servicio voluntari pro juvenes debe continuar in le structura del programma de juvenes proponite per le Commission pro le periodo de 2000~2004.

Le scopo del SVE es dual: Primo, le participantes va beneficiar se proque illes va allargar lor horizontes per cognoscer un altere pais e su lingua e cultura. Illes va acquirer nove habilitates e accrescer lor confidentia in se mesmes que va adjutar les in lor vitas professional.

Secundo, le voluntarios va exequer travalios que essera de beneficio al communitate in lor pais patronante, tal como travalio con infantes o le veteres, le projectos ambiental, o projectos artistic o theatral. Patronar un voluntario pote consequentemente apportar beneficios substantial al organization e al communitate patronante.

Illo pote portar un valor aggregate europee, social, cultural e practic al activitates proque le juvene veniente de un pais estranier va portar ideas fresc e un puncto de vista innovative. Le SVE non es un substituto pro empleos pagate o existente o potential e le participantes non pote esser usate como mano-de-obra incostose, mais debe contribuer in projectos que ha como lor scopo satisfacer necessitates social. Il es equalmente aperite a statos membros initiar initiativas bilateral que pote vader plus lontan que es possibile con le SVE, durante que illos beneficia del schema.

Le Commisario Edith Cresson accentuava le importantia del SVE, arguente que “Europa non se tracta solmente de meetings a alte nivello. Activitates de base es justo tanto importante in construer Europa. Voluntarios juvene va haber le opportunitate de involver se in tal activitates, excambiar ideas e experientias, e contribuer con lor enthusiasmo e creativitate. Illes pote adjutar nos a deponer le fundationes del futuro.”


Initio Alto