Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

J U N I O ,   1 9 9 8
Verification a frontieras: un prioritate del Regno Unite

Traducite de EP News per Stan Mulaik.

Un del questiones principal al Summito de Amsterdam esseva le si-nominate accordo de Schengen super libere movimento e le abandonamento de controlos de passaportos inter le statos membros a esser introducite a in le Tractato del Union Europee.

Isto ha essite un demanda de europarlamentarios desde multe tempore e effectivemente permitte al Commission Europee e le Parlamento Europee un voce in le processo. Totevia le Regno Unite e Irlanda non signava le accordo de Schengen e es anxie a retener controlos de frontieras a portos e aeroportos, ben que il ha necun verificationes de passageros inter le Britannia e Irlanda.

Le Regno Unite argue que como un nation insular, illo non incontra le mesme situation como le Europa continental con frontieras terrestre e milles de personas transversante le frontieras cata die. Illo equalmente considera que le controlos de passaporto es un del armas principal in le lucta contra le crimine organizate e le contrabando de drogas. Illo es tamben un maniera de confrontar le immigration illegal. De plus, si le pais non acceptarea frontieras aperte, illo certo significarea le introduction de cartas de identification, un idea introducite per le previe governamento, mais trovate in necun parte del manifesto del nove Governamento Labor.

A Amsterdam le intention esseva lassar aperte le via pro e le Regno Unite e Irlanda a junger se a un data plus tarde. Grecia, Italia, e Austria es programmate a devenir membros del accordo de Schengen super libere movimento plus tarde in le anno.

Isto non significa que le accordo de Schengen non include un ingagiamento de tractar le crimine international in un Europa sin frontieras. Le esquadras "volante" de policia pote exploitar le provisiones del accordo de Schengen pro operar trans frontieras, e in un operation juncte recente, le policias hollandese e german patruliava un urbe hollandese insimul. In addition le Gendarmeria Hollandese responsabile pro controlar le immigration stoppava alcun 26.110 estranieros qui essayava entrar le pais sin documentos valide in 1996 e alcun 5.810 documentos de viage falsificate esseva discoperte como un resultato de examinationes a hasardo in Hollanda. In le april del mesme anno, le hollandeses usava tamben un clausula in le accordo de Schengen, que permitte a paises le refusa de entrata de gruppos selecte super le base del securitate national, pro interdicer 1.500 turchos e curdos de entrar le pais.

Nonobstante le Regno Unite es anxie a prender un parte positive in Europol, le unitate embryonic del cooperation paneuropee de policia designate a tractar le crimine international. Le Regno Unite es tamben un del usatores le plus active del base de datos international.

Le immigration e le question del cercatores de asylo es un altere area controverse ubi e le Regno Unite e Irlanda prefererea que le formulation del politica remanerea in le manos national. Sub le si-nominate principio de "salverefugio" accordate per le statos membros sub le accordos intergovernamental del "Tertie Pilar", cata pais consenti a respectar le regulas national de sollicitationes de asylo.

Le intention es que cata stato UE pote rejectar un sollicitation de asylo si un requesta jam ha essite rejectate per un altere stato membro e retornar le requirente de asylo al pais de prime arrivata in le UE. Sub accordos presente appello es limitate a cortes national in tanto que le question cade foras le scopo del Corte Europee de Justitia. Isto pote ducer, totevia, a alcun decisiones surprendente con un judicio in un caso in Anglaterra refusante a recognoscer le Belgica como un "salverefugio" e le retorno del sollicitante de asylo al pais in question.

Un altere appello, nonobstante, concernente un sollicitante objectante a su retorno a Francia esseva refusate super le base que le proceduras proprie esseva disponibile in Francia.

Mais con le sollicitationes de asylo ora currente a 28.000 a cata anno in le Regno Unite e con predicitiones de crescer a 6.000 al fin del anno in Irlanda, il ha alcun anxietate in ambe paises que le systema es ora abusate. De facto un gruppo de romanianos destinate a Irlanda con passaportos falsificate de Espania esseva interdicte justo iste mense passate de imbarcar super un barca de transbordo a Cork. Mesmo le Internet ha essite apportate al debatto con information super beneficios de assistantia social pro cercatores de asylo ora disponibile in le Internet.

Malgrado le controlos de frontieras, numerose refugiatos passa per le rete e il ha un estimativa de un million de immigrantes illegal in le Regno Unite.

Nonobstante, il es in Germania ubi le plus alte numero de sollicitantes es situate que le situation es tense. Con suspectos de 91 nationalitates differente essente retenite super accusationes criminal, il non es surprendente vider Germania in un campania pro un plus juste distribution del sollicitantes de asylo inter le altere statos membros.


Initio Alto