Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

M A I O ,   1 9 9 8
Euro a dece-un con le "si" del Parlamento Europee

Deputatos approba candidatos al direction del BCE, ma condemna accordo del Consilio Europee super le mandato del Presidente.

Traducite de Tribuna da Europa per Ensjo.

Le die 2 de maio remanera in le historia como le die in le qual esseva create le moneta unic, le euro. Il es ver que su nascentia solo occurrera le die 1 de januario de 1999 e que le notas de banca solo apparera al initio de 2002, ma le decision fundamental, le creation del moneta unic con le participation de dece-un Statos-Membros — Austria, Belgica, Espania, Germania, Hollanda, Finlandia, Francia, Irlanda, Italia, Luxemburg e Portugal —, esseva de facto prendite in le postmeridie de 2 de maio, per le Chefs de Stato e de Governamento reunite a Bruxelles. E le PE habeva un participation absolutemente fundamental in le processo, per dar su approbation, in session special realizate in le mesme matino de ille die, al creation del moneta unic.

De facto, le Tractato prevideva que le decision super le creation del euro super qual le Statos-Membros que participarea in illo desde le initio esserea prendite per le Chefs de Stato e de Governamento, sub proposition del Consilio e post consultation al PE. Le facto que le Parlamento esserea le unic institution directemente representative del citatanos interveniente in le processo de creation de alco tanto importante pro le vita del europeos como lo es un nove moneta esserea ja sufficiente pro dar un notion del extraordinari importantia del session special que le PE realizarea le die 2 de matino. Ma le divergentias que surgeva inter le Dece-Cinque quanto al nomination del candidato a Presidente del nove Banca Central Europee, que provocava un longe attender de quasi dece-duo horas, veniva a render ancora plus visibile le rolo representate per le PE, que surgeva al oculos del opinion public, durante ille longe horas in attender, como le unic garante del transparentia del processo e del interesse collective del europeos, sin reguardar questionalias resultante de parve vanitates national, como lo es le question del nationalitate del Presidente del BCE.

PE esseva le prime a pronunciar se

Le decision del PE se basava super le propositiones formulate per le Consilio del Ministros del Economia e del Financias, le mesme die 1 de maio, con base super reportos del Commission e del Instituto Monetari Europee super le convergentia, super le quales nos ha informate nostre lectores in nostre edition anterior. A proposito, le conclusiones de ille reportos esseva equalmente analysate per le PE in le session realizate a Bruxelles, tres dies ante le referite session extraordinari super le euro, e per isto le decision del deputatos esseva profundemente fundamentate.

De facto, le deputatos poteva verificar que tote le dece-un Statos-Membros satisface le criterios relative al taxa de inflation, al taxas de interesse e al stabilitate del taxa de cambio in le ultime duo annos, e se pote dicer le mesmo quanto al situation budgetari, viste que totes respecta le criterio fixate pro le deficit budgetari.

Quanto al debita public, solo duo paises — Belgica e Italia — presenta valores clarmente superior al valor de referentia. A causa de isto, le PE repetava le recommendationes del Presidente del IME, insistente que le governamentos in question assume compromissos concrete a fin de continuar le processo de consolidation del debita.

Sequente le opinion de su relator, le Presidente del Comission del Budgets Karl von Wogau (PSE/D), le deputatos accentuava equalmente le necessitate que tote le participantes in le UEM respecta strictemente le Pacto de Stabilitate e Crescimento. Ma le PE iva ancora plus longe, considerante que, ben que illo non face parte integrante de un criterio formalmente inscripte in le Tractato, le taxa de disoccupation debera esser equalmente prendite in consideration durante le evalutation del tendentias economic presentate per le Statos-Membros, e sublineante le necessitate que Europa intensifica le combatto contra le disoccupation, que potera constituer un menacia al prosecution del principal objectivos del UEM. Considerante isto, le deputatos appella pro le transposition al practica del grande conclusiones super le lucta contra le disoccupation prendite per le Consilio Europee de Luxemburg.

Le conflicto super le Presidentia del BCE

Un puncto in le qual il habeva quasi unanimitate inter le deputatos esseva illo del necessitate que le Consilio Europee debe designar un unic candidato a Presidente del BCE pro le proxime mandato, opponente se deciditemente a qualcunque division del mandato — de octo annos — inter differente candidatos pro satisfacer le interesses nationalista de alcunos. Le deputatos considerava que un tal compromisso violarea le Tractato e mitterea in question le credibilitate e le independentia del Presidente del BCE.

Il es ben cognite lo que se passava durante le Summitate del Chefs de Stato e de Governamento initiate in le postmeridie del die 2 de maio, al qual le Presidente Gil-Robles presentava le resultato del decisiones prendite per le PE durante le matino: si le Dece-Cinque non habeva qualcunque difficultate in constatar que le dece-un satisfaceva plenmente le conditiones necessari pro le passage al moneta unic e se limitava a confirmar su nascentia a 1 de januario de 1999, le mesmo totevia non se passava quanto al nomination del candidato a Presidente del BCE. Il esseva quasi dece-duo horas in attender, usque le proclamation de un compromisso que, sin violar formalmente le Tractato, tamben restava distante de corresponder al exigentias del deputatos: le candidato nominate, le Presidente cessante del IME, Wim Duisenberg, admitteva le possibilitate de, per libere voluntate, renunciar a su mandato post esser concludite le phase de lanceamento del euro. Le candidato appoiate per le franceses, Jean-Claude Trichet, poterea alora assumer un nove mandato...

PE es le "foro democratic del euro"

Ma le rolo del PE non se limita al simple approbation del proposition de creation del moneta unic e del lista del paises que in illo participara desde le initio. Dies antea, le PE habeva ja insistite in le rolo essential que recaderea super illo a fin de assecurar le legitimitate democratic del decisiones a prender per le BCE in le exercitio de su competentias de definition del politica monetari commun pro le paises que adhereva al euro. Sin poner in question le independentia functional del BCE, le deputatos vole, de facto, assecurar le transparentia e le legitimitate del decisiones prendite per illo, serviente como instantia de explication e discussion public de ille decisiones, a fin de garantir que le BCE non se inclausurara in un "turre de ebore" e de assecurar le comprension per le citatanos del grande decisiones del politica monetari. In altere parolas, pertine al PE le rolo de "foro democratic del euro".

In iste senso, le Tractato mesme exigeva que le PE se pronuncia super le candidatos indicate per le Consilio Europee al direction del BCE. A fin de poter fundamentar evidentemente su position, le deputatos realizava un serie de auditiones public del candidatos indicate, durante le quales istes habeva opportunitate de exponer lor convictiones super le modo como illes pensa que su functiones debe esser executate e le modo como illes concipe le relationes futur inter le BCE e le Parlamento. Dies postea, a Strasbourg, le deputatos rendeva bastante clar lor appoio al candidatos, cuje qualitate professional les convinceva plenmente, ma illes non se abstineva de expressar lor displacer a causa del modo como le Consilio Europee habeva resolvite le problema del nomination del candidato al Presidentia, malgrado que varie deputatos habeva denunciate le influentia negative que le exigentia de unanimitate habeva exercite super le processo, lassante un decision tanto importante al mercede de un veto basate in capricios de character nationalista derivate del exigentias del politica interne.

Un exemplo de tal preoccupation esseva le alteration introducite per le session plenari que accentua le necessitate que le Presidente del BCE habe in consideration le continuitate del leaderantia del Commission Executive del Banca, evitante un succession prematur o simultanee del Presidente e del Vice-Presidente.


Initio Alto