Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

A P R I L ,   1 9 9 8
Dece-un paises satisface le criterios pro le moneta unic

Traducite de Tribuna da Europa per Ensjo.

"Hodie, die del anniversario del signatura del Tractato de Roma, le Commission recommenda que 11 statos-membros participa in le Euro a partir del 1 de januario de 1999: Austria, Belgica, Espania, Finlandia, Francia, Germania, Hollanda, Irlanda, Italia, Luxemburg e Portugal."

Con iste parolas que le Presidente del Commission, Jacques Santer, annunciava al membros del Commission del Affaires Economic e Monetari e del Politica Industrial le conclusiones del executivo communitari super le effortios de convergentia interprendite per le statos-membros visante le participation in le tertie phase del UEM, le qual spectara le nascentia del moneta unic, le Euro. E le Presidente Santer non negligeva rememorar, con placer, le surrisos complacente con que habeva essite recipite su declarationes de un o duo annos retro, quando ille prevideva que le Euro esserea un realitate in le data previdite e con le participation de un elevate numero de paises.

Le numeros es elucidative: le inflation medie es 1,6%, satis infra le 2,7% previdite in le Tractato (solo un stato-membro excede iste valor). Le deficit public medie del UE es 2,4% (dece-quatro statos-membros es infra le 3% previdite in le Tractato). Le debita public attinge in media 75%. Le taxas de interesse a longe termino attinge, in media, 5,9%. Ante iste datos, ja non resta dubitas que le spatio monetari unic a esser create a partir del 1 de januario de 1999 involvera le dece-un statos-membros referite, deveniente le major del mundo (con 290 milliones de citatanos, contra 268 in le SUA e 126 in Japon) e representante 19,4% del PIB mundial (SUA 19,6 e Japon 7,7).

A proposito, su peso economic poterea esser ancora major, perque le Regno Unite e Danmark non integrara immediatemente le Euro solmente perque illes non lo desira, viste que illos satisface equalmente le conditiones pro facer lo. Svedia, que tamben non desira in iste momento participar in le moneta unic, non satisface le exigentia que su moneta debe haber pertinite al minus durante duo annos al Systema Monetari Europee. Solmente Grecia non participa per motivos externe a su voluntate, viste que illo non satisface alcun del criterios de convergentia stabilite per Maastricht.

Le 26 de martio, ha essite le vice del Presidente del Instituto Monetari Europee, Wim Duisenberg, presentar le reporto super le convergentia de su Instituto al deputatos, emphatizante le excellente resultatos obtenite per le majoritate del statos-membros, ma sin negliger rememorar que il es necessari mantener le rigor demonstrate usque ora, respectante le pacto de stabilitate, pro transformar le Euro in un ver successo: evitante augmentar le deficits public e reducente le nivellos de indebitamento, ma tamben garantiente al statos-membros le flexibilitate financiari necessari pro que illos pote responder al crises cyclic, pro lo que il es convenibile assecurar, a medie termino, le equilibrio budgetari. E le Presidente del IME appellava equalmente al prosecution del elimination del rigiditate structural del mercato de travalio e al moderation salarial, perque le Euro pote favorir le competitivitate, ma illo non pote, per se solmente, crear empleo.

Resta, ora, attender le decision final del Consilio Europee, le proxime 2 de maio, post le opinion del PE, que se pronunciara in un session extraordinari realizate le mesme die, in in Bruxelles.

LE STATOS-MEMBROS ANTE LE CRITERIOS DE CONVERGENTIA

Inflation Deficit public Debita
(Januario 1998) (% del PIB — 1997) (% del PIB — 1997)
Valor de referentia 2,7 3,0 60,0
Belgica 1,4 2,1 122,2
Danmark 1,9 -0,7 65,1
Germania 1,4 2,7 61,3
Grecia 5,2 4,0 108,7
Espania 1,8 2,6 68,8
Francia 1,2 3,0 58,0
Irlanda 1,2 -0,9 66,3
Italia 1,8 2,7 121,6
Luxemburg 1,4 -1,7 6,7
Hollanda 1,8 1,4 72,1
Austria 1,1 2,5 66,1
Portugal 1,8 2,5 62,0
Finlandia 1,3 0,9 55,8
Svedia 1,9 0,8 76,6
Regno Unite 1,8 1,9 76,6
Union Europee (media del 15) 1,6 2,4 72,1

Initio Alto