Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

A P R I L ,   1 9 9 8
Agenda 2000 — protestos al planos de reformas regional

Le planos del Commission pro reformar le planos de auxilio al regiones ha provocate forte opposition del areas con possibilitate de suffrer perditas. Le EP News de iste mense considera le objectivos del nove approche e evaluta le reactiones usque ora.

Traducite ab EP News per Ensjo.

Le Presidente del Commission Jacques Santer e le Commissario pro Affaires Regional Monika Wulf-Mathies confrontara dur negotiationes in le menses avante, perque illes va effectuar le plus radical replanamento del programmas regional de auxilio desde le introduction del fundo in 1973. Le fundo ha essite introducite post le adhesion de RU e Irlanda, pro compensar le facto que illo non se beneficiarea multo del CAP. Le nove fundo fornirea assistentia financiari pro promover disveloppamento regional in areas plus paupere. In le prime dies illo ha essite fortemente criticate per deputatos, qui videva statos-membros usar lo mermente pro pagar programmas essentialmente national, in vice de usar lo como dispensa additional in programmas de prioritate europee.

Subdispendite

Le fundo rapidemente se expandeva con le adhesion de paises paupere como Espania e Portugal. Illes faceva bon uso del assistentia financiari extra pro meliorar servicios de infrastructura basic como stratas, ferrovias e systemas de approvisionamento de aqua. Ma in annos recente le fundo ha essite criticate per esser lente e bureaucratic; multe organizationes non poteva mesmo dar se le pena de sollicitar financiamento. De facto, in 1996, 10 billiones de ecus ha essite restituite al statos-membros perque illos non poteva esser dispendite. Un reporto de deputatos revelava que le debilitate area de carbon e aciero de Belgica (Hainault) solo poteva dispender 17 per cento de su allocation. Ora, le Commission ha pauc optiones ultra reducer dispensas, pro pagar le ampliamento per medio de financiamento pre-adhesion de 46,8 billiones de ecus pro le paises del Europa Oriental pro le annos 2000 a 2006; e, del altere latere, un recusa firme per le Ministros del Financias in accordar con un augmento substantial in le budget del UE. Le actual limite de financiamento pro le budget del UE es 1,27 per cento del PIB del Union.

Le Commission propone un fundo regional total de 218 billiones pro le periodo de septe annos a partir de 2000. Isto representa un legier augmento al 175 billiones de ecus allocata pro le periodo 1992~1999, que nonobstante excludeva grandemente le nove statos-membros Austria, Finlandia e Svedia. Iste vice le objectivo es melior directionamento de fundos al regiones le plus paupere, simplification del procedimentos gerential e melioration del efficientia. Le Commission spera que le nove approche, per le qual le grosso del fundos ira al regiones prioritari del Objectivo 1 con un PIB menor que 75 per cento del media del UE, sera plus effective. Ma a fin de amortir le colpo e recuder le impacto super le regiones que suffrera perditas, le Commission propone un periodo de transition de quatro a sex annos, e un formula pro assecurar que nulle pais perdera plus que un tertio del supporto pro le categoria de Objectivo 2.

Il ha essite un critica constante del deputatos que troppo de decisiones es prendite centralmente in Bruxelles, distante del regiones interessate. Le Commission responde per propor un approche "de basso al alto", involvente organizationes como autoritates local e gruppos de pression. Illo vole restringer su rolo al planamento strategic e al allocation de fundos global pro assecurar que le schemas sia de accordo con le directivas accordate per le UE. Le ipse statos-membros deberea assumer le responsabilitate de implementar e gerer programmas adequate a differente circumstantias. Esserea stabilite in cata stato un autoritate unic que, con un committe de controlo, esserea responsabile per le selection de projectos particular. Le contabilitate tamben esserea reinfortiate con le production de reportos annual pro cata stato e controlos financiari stricte. Le Commission haberea permission de intervenir in casos de suspicion de fraude.

Rationalizante le auxilio regional

Objectivo 1: Regiones cuje PIB per capita es minor que 75 per cento del media del UE. Le auxilio essera gradualmente discontinuate al longo de un periodo de sex a septe annos pro areas ja non qualificate.

Objectivo 2: Areas que confronta declino industrial e cambio structural, areas suffrente depopulation, zonas urban disfavorite, citates costier dependente de pisca. Le disoccupation es un criterio-clave in evalutar areas a qualificar se.

Objectivo 3: Fundo Social Europee con assistentia directionate al attacco al alte disoccupation, combatto al paupertate, adjuta al marginalizatos, education e trainamento anticipante cambio economic, promotion de opportunitates pro feminas.

Tabula 1

Agenda 2000: Dispensa regional 2000~2006 (billiones de ecus)
2000 2001 2002 2003 2004 2005 2006
33,2 33,0 35,8 36,8 37,7 38,7 39,8

Tabula 2

Agenda 2000: Dispensa regional 2000~2006 (billiones de ecus)
Programmas regional 218,4 Total 286
Fundo de cohesion 20,8
Ampliamento 46,8

Initio Alto