Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

J A N U A R I O ,   1 9 9 8
Preste pro lancear le nove moneta

Con Le Ministro Estranier de Grande Britannia, Robin Cook, parlante al deputatos super le compromisso del Regno Unite al preparation del via a un lanceamento ben-succedite del euro a 1 de januario de 1999, EP News examina le questiones involvite e le evenimentos in le via avante.

Traducite de EP News per Stan Mulaik.

Robin Cook in su discurso al deputatos reaffirmava: 'Britannia va esser in le presidentia quando le decision crucial essera facite in maio. Nos va complir iste responsabilitate con le maximo de nostre capacitates, plen- e scrupulosemente in un maniera que monstra optimemente le approche constructive de Europa. Nos vole que le union economic e monetari sia un successo.

'Britannia mesme non essera in le prime unda, mais isto non significa que nos ha necun interesse in le successo del union monetari. Nostre economia es ligate a illo del continente e nos ha omne ration pro laborar pro un lanceamento ben-succedite.'

Intertanto, le parlamento iste mense dava su approbation a plure reportos-claves elaborate pro facilitar le introduction del euro.

Le deputatos recognosce que le euro va haber un effecto profunde super le mercatos de capitales de Europa. Con le decision de Francia, Belgica, Nederland, e Germania de converter debito existente e nove emissiones in euros a partir de 1 de januario de 1999, isto agera como un stimulo pro crear un mercato unificate europee in obligationes. On pote expectar anque que le euro va conquestar un parte del commercio international presentemente conducite amplemente in dollares. Deputatos anque appoiava un reporto presentate per Ingo Friedrich (D, PPE) qui appellava a un relaxation de regulas national super investimento in fundos de pension private pro facilitar le investimento in le nove zona euro. Sr. Friedrich signalava le necessitate de elimination de distortiones de taxas, le unification del mercatos de actiones de Europa e le introduction de un singule lege pro companias in le UE.

Ministros de financias in le UE, normalmente le plus reluctante del leaders governamental a consentir in applicar regulas super questiones financiari, ha recognoscite le impacto imminente del moneta per consentir in un codice voluntari de taxation. Consultores de investimentos international como le firma Moody jam predice que le establimento del union monetari va ducer a un accrescimento considerabile de transactiones financiari e fusiones commercial trans frontieras, con prospectos particularmente favorabile pro le servicios bancari institutional e al detalio.

Le introduction del nove moneta intialmente va influentiar plus tosto institutiones financiari e grande firmas que le consumitores. Transactiones non liquide, includente transferimentos electronic de moneta, debito directe, e pagamentos per cartas de credito pote esser denominate in euros a partir de 1 de januario de 1999.

Illo anque va ducer al creation de un singule mercato de servicios financiari in le zona euro. Isto va significar un crescimento del activitate bancari e altere productos financiari tal como polissas de assecurantia e hypothecas trans frontieras. Il es possibile que institutiones financiari va provider prestos e hypothecas in euros durante le periodo transitional. On anque expecta que un moneta stabile va producer taxas de interesse menor que illos currentemente in vigor in le Regno Unite, ben que isto non significa que illos essera passate a prestatarios. Bancas e institutiones financiari es ben consciente del necessitate de mantener taxas competitive pro attraher sparniatores.

Mais le establimento del confidentia in le euro inter le citatanos in Europa es le problema primari del leaders in le UE. A parte de lor manco de cognoscimento del aspectos technic del introduction del euro, il non esserea suprendente si citatanos e consumitores esseva confundite per le integre debatto in le UEM, date le punctos de vista largemente divergente e contradictori tenite per economistas, commerciantes, e politicos super le desirabilitate de un singule moneta del typo previdite sub le Tractato.

Ni ha le processo essite adjutate al oculos del citatanos per le fortunas fluctuante del processo ducente al UEM que ha contribuite al incertitude circa le introduction del moneta singule. Le incertitude super qui essera e qui non essera in le prime unda de statos membros participante ha anque impedite le processo.

Le varie grados de appoio al moneta singule indica que timores e anxietates super le introduction del euro varia inter statos membros. In iste circumstantias, autoritates regional e national es in le melior position pro responder al anxietates de lor citatanos e consumitores.

Differentias cultural, linguistic e historic inter statos membros anque suggere que le governamentos national in loco del Commission Europee deberea diriger le campanias informational pro promover le euro, e le Regno Unite ha ora consentite in participar in istos.

Deputatos ha anque assumite le anxietates de consumitores per insister que salveguardas appropriate sia establite pro assecurar que necuno exploitara le compratores quando le precios essera convertite de monetas national a euros, ni les cargara costos de conversion inacceptabile.

Iste mense, deputatos faceva un appello al Commision pro presentar propositiones designate pro assecurar que billetes de banca e numismas national sia convertite in euros gratuitemente pro usatores.

Il habera un approche flexibile al precios dual durante le periodo transitional inter 1999 e 2002, con vistas a attinger un equilibrio inter satisfacer le exigentias del consumitores e non poner troppo de cargas super le parve botecheros.


Initio Alto