Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

J A N U A R I O ,   1 9 9 8
Politica del SU criticate in le cerca de un fundation commun

Traducite de EP News per Stan Mulaik.

Parlamentarios europee entrava in conflicto iste mense in un debatto super relationes commercial con America quando le politica del SU, particularmente concernente le restrictiones super companias europee commerciante con Cuba, veniva sub critica.

Durante que un clar majoritate recognosceva le importantia del relationes con le major socio commerical de Europa, un minoritate vocifere, dirigite per Bernard Antony (F, NI), reprimendava le SU pro lo que illes reguardava como un approche egoistic al relation.

Date que le SU es le socio commercial le plus grande de Europa con volumine de negotios supra $250 billiones, il habeva pauc disaccordo super le importantia del relationes commercial. Ni esseva il le caso que multe parlamentarios questiona le necessitate de fortificar iste relationes commercial. Totevia, il habeva timores de alicunos que le situation currente beneficiava le SU in detrimento del UE, que illo non reguardava como un socio equal.

Multe parlamentarios, includente Dominique Souchet (F, I-EDN) e Erika Mann (D, PPE), condemnava le pression american pro poner restrictiones super le relationes commercial con paises tertie per medio de legislation como le Acto de Helms-Burton, que penaliza paises e companias estranier in relationes commercial con Cuba. Sr. Souchet demandava que le UE elabora medios legal que facerea possibile, si necesse, facer menacias de represalia credibile.

Altere parlamentarios argueva que le acto exemplificava le arrogantia del Congresso del SU, que on non poterea tolerar lo, e que illo esserea certemente scopo de objection intra le Organization Mundial del Commercio. Il anque habeva discontento super altere disputas inter le UE e SU tal como le fusionamento de McDonnel-Douglas.

Del altere latere, parlamentarios dava le benvenitas al Nove Agenda Transatlantic (NAT) que esseva signate inter le UE e le SU in 1995. Illo cerca promover le relationes UE–SU e adjutar lo a esser un fortia pro le ben in le mundo. Isto, Sra. Mann argueva, habeva ducite a un forma totalmente nove de cooperation e illa recommendava vehementemente que Europa profitarea de illo.

In le campo del politica estranier un numero de parlamentarios argueva que ambe lateres esseva ancora in le processo de venir al terminos con le situation create per le cadita del communismo.

Ante 1989, diceva Jim Nicholson (Irlanda del Nord, I-EDN), le affaires esseva multo plus simple in le facie de un menacia commun. Le opinion esseva dividite, nonobstante, super si le SU peccava in adoptar frequentemente un approche unilateralista in politica estranier o si il esseva le momento pro que Europa disveloppava su proprie politica estranier commun. Olivier Dupuis (I, ARE) credeva que le UE debeva plus al SU que le reverso, e on non poteva poner le culpa pro le fragmentation de Europa super le americanos.

In un vena similar, alteres argueva que le inabilitate del UE in parlar con un voce singule super menacias externe contra le securitate esseva le fortia primari detra multes del actiones "interventionalista" del politica estranier de America. Gary Titley (Greater Manchester West, PSE) citava le conflicto bosnie como un exemplo flagrante de un caso ubi plus de action e minus de rhetorica del parte del UE esseva necesse. John Cushnahan (Munster, PPE) rememorava tote le mundo del planate reduction del presentia militar del SU in Europa in le futuro, e opinava que il habeva un exigentia imminente que UE disveloppava su proprie capacitate de defensa.

Un vista differente esseva exprimite per un numero de parlantes qui sentiva que in su politica estranier le SU habeva adoptate un approche unilateralista que esseva sovente detrimental al interesses de Europa. Bernard Antony (F, NI) vadeva al puncto de condemnar lo que ille argueva que esseva le "subjection del Europa al SU."


Initio Alto