Union Europee

Tribuna de Europa
IN INTERLINGUA


Que es Interlingua?

Breve Vocabulario

Breve Grammatica

Union Mundial pro Interlingua


Interlingua (disveloppate per IALA)

J A N U A R I O ,   1 9 9 8
Notitias breve

Traducite de Tribuna da Europa per Ensjo.

CLONAGE. Le Parlamento Europee lanceava un appello al prohibition del clonage de esseres human in le Union Europee, exhortante le statos membros del Consilio de Europa a subscriber e a ratificar le convention super le Derectos del Homine e le biomedicina, inclusivemente su protocollo additional super le prohibition del clonage de esseres human, concludite le die 12 in Paris. Le deputatos vole que cata Stato membro del Union Europee approba legislation prohibente tote e qualcunque investigation in materia de clonage in su territorio e previdente sanctiones penal pro su violation.

ARMAS. Le Parlamento Europee congratula se que le Presidentia Britannic intende proponer un codice de conducta super le exportationes de armamento a altere paises que non respecta le Derectos del Homine o a certe regiones conflictuose. Le deputatos spera que le nove codice de conducta impedira le possibilitate que, si un stato membro refusa exportar armas, un altere stato membro profitara surrepticiemente de iste facto, petente que le codice limita le libertate del statos membros de conceder o refusar licentias de exportation de armas e que illo include un mechanismo clar destinate a evitar le violation de su regulas. Le codice deberea in ultra continer un lista de destinationes "sensibile", un systema de verification e de controlo e un mechanismo de information e de consulta mutue super le concession o recusation de licentias de exportation de armas.

ALIMENTOS. A fin de assecurar le qualitate de certe productos alimentari, como le melle, le dulces, le geleas, le saccharos o le succos de fructos, le Parlamento Europee approbava un directiva reinfortiante le exigentias del etiquettage de iste productos, a fin de assecurar un melior information super su contento e su qualitate al consumitores. Assi, le Parlamento Europee crede que il debera esser indicate si le producto contine o non substantias additionate, como saccharos o vitaminas. In le caso del succos de fructos, le saccharo additionate non debe ultrapassar le contento natural in saccharo del fructo. Le imballages de melle debera necessarimente indicar lor region de origine.

ROC. Le Parlamento Europee vole crear un statuto europee del revisores official de contos (ROC), per medio de un harmonisation de requisitos minime pro le accesso al profession, independentia, responsabilitate, etc., a fin de permitter le ver libere prestation de servicios per le revisores official de contos in tote le Communitate. Per medio de iste harmonisation essera possibile prender mesuras quanto al libertate de stabilimentos e al libere prestation de servicios de revision de contos in tote le Union Europee, eliminante le obstaculos legislative e administrative que continua a exister e permittente que le revisores official de contos recognoscite per un stato membro pote effectuar revisiones in tote le Union Europee, de accordo con le exigentias de un ver Mercato Unic.


Initio Alto