Skip navigation.
Home

Le statutos del Section International (SI) del Union Mundial pro Interlingua (UMI)

  Iste statutos es in vigor ab le acceptation.

1. Nomine e sede

  • Le Section International (SI) es le association international del Union Mundial pro Interlingua, abbreviate SI, fundate le 1 de septembre 2010.
  • Le sede del SI es le sede del UMI.
  • Le SI es un parte del UMI.

2. Scopos

Le scopos principal del SI es:

  • coordinar le effortios pro promover le cognoscentia e utilisation practic de interlingua in le paises ubi nulle union national pro interlingua existe.
  • laborar activemente pro mantener un standard alte de interlingua in iste paises.
  • initiar, incoragiar e supportar incontros local pro interlingua.
  • representar interlingua ante e in foros national.
Subscopos concrete e practic:
  • organisar personas con un interesse pro interlingua in paises ubi il non ha uniones national pro interlingua
  • laborar pro establir organisationes national pro interlingua in cata pais ubi il ha membros del SI
  • supportar le effortios pro publication e mediation de litteratura in interlingua in paises ubi il non ha uniones national pro interlingua.

3. Membros

Pro devenir un membro del SI cata persona debe satisfacer le conditiones sequente:

  • condivider le scopos describite in le statutos del UMI
  • pagar le quotisationes annual. Le quotisation, que es fixate per le consilio del SI, contine le abonamento del magazin official del UMI.

4. Financias

Le financias del SI se basa super:

  • quotisationes del membros
  • legatos, donationes e subsidios
  • altere beneficios financiari

5. Gestion

Pro le administration currente le membros del SI appuncta un consilio con un presidente, un vice-presidente e un tresorero. Un membro del Consilio Executive del UMI va esser appunctate per iste consilio, e adjungite al consilio de SI. Le Consilio Executive approba le personas appunctate.

Le electiones pro le Consilio del SI se effectua in un reunion cata duo annos, que es arrangiate como incontro virtual, si un incontro personal non es possibile.

Responsabile pro le gestion del SI es le Consilio del SI.

6. Propositiones e decisiones

Cata membro del SI ha le derecto de facer propositiones e presentar los al Consilio, que determina le tractamento a interprender.

A. Propositiones re simple questiones del administration es tractate intra le Consilio.

B. Propositiones re nove campos o modos de action pro le SI debe esser tractate per le Reunion del membros. Ingagiamentos in interprisas que require nove analyses del budget pertine a iste categoria.

C. Le budget del SI es sempre tractate per le Reunion del membros.

Le labor debe continuar sin interruption, e propositiones es tractate e decidite continuemente. Le medio primari de contacto es posta electronic. Solmente in le casos que iste methodo non es applicabile, le posta normal pote esser usate. Omne negotiationes e decisiones es presentate e archivate in scripto.

7. Cambiamentos de iste statutos

Cambiamentos de iste statutos pote esser facite per le Consilio Executive del UMI.

Create per le Consilio Executive del Union Mundial pro Interlingua: 2010-09-01
© 2010 Union Mundial pro Interlingua

Discarga Le statutos del Section International (SI) del Union Mundial pro Interlingua (UMI) (in formato PDF)

Initio del pagina