Podcast in interlingua: Un introduction

Un mini-guida de facer un bon podcast in interlingua.

Per: Thomas Breinstrup

Un manuscripto pro un podcast - o registration de audio - tracta de scriber parolas pro le aure. On debe scriber lo in un altere maniera que quando alteres debe leger lo in scripto. Un narration auditive debe sonar natural.

Un bon methodo pote esser facer le registration, durante que on parla del thema que le manuscripto debe tractar. Pois, ascolta le registration, transcribe le texto, "munda" lo e registra lo de novo. Memora que le ascoltator debe comprender le audio le prime vice - il non ha le possibilitate de un repetition o de leger le texto.

Al manuscripto

• Usa sempre phrases breve e assatis precise.
• Essaya solmente presentar un idea per phrase.
• Scribe toto in le maniera que tu vole pronunciar lo. Evita symbolos e abbreviationes - scribe le plen parolas (€ = euros, i.a. = inter altere, NU = le Nationes Unite).
• Scribe cifras de zero a dece per litteras. Scribe in parolas cifras grande como 283 (duo centos octanta-tres) e 1.234.567 (un million duo centos trenta-quatro milles cinque centos sexanta-septe), e scribe 22 milliones in vice de 22.000.000 (o 22 mio.).
• Controla tu manuscripto per leger lo per alte voce. Isto va revelar phrases que functiona sur papiro ma non quando on debe ascoltar los. Rescribe tal phrases pro facer los plus facile (e natural) a leger e assi comprender.

Al registration

• Sona natural. Cambia le intonation del voce, exactemente como tu parla normalmente. Non face lo sonar, como si tu lege un manuscripto. Surride, quando tu lege le parolas.
• Non parla troppo hastivemente.
• Parla distinctemente - non "mangia" le fin del parolas.
• Memora le pausas inter le phrases. Le mente debe usar un poco de tempore pro comprender le message parlate, dunque un pausa post le fin de cata phrase va esser un bon adjuta. Ma sempre assecura que le pausas non deveni stops.
• Non sede troppo proxime al microphono.
• Ascolta le resultato.

Lege plus

  Discarga le instruction de como facer registrationes in formato MP3 o instruction de como facer registrationes in formato OGG in un bon qualitate pro le radio per le programma gratuite Audacity.