Skip navigation.
Home

2007 - anno active pro interlingua

UMI  2007 debe esser le anno de bon resultatos pro interlingua. Isto require le assistentia de omnes, qui se interessa pro interlingua - ma le assistentia pote esser personal. Naturalmente, il ha besonio de reclamo e information public super interlingua, ma le prime passo es mesme apprender le lingua.

Es in iste momento - ci e ora - que tu debe decider dar tu assistentia pro facer 2007 un anno active pro interlingua.

  • Face lo - apprende interlingua! Es multo simple. Le grammatica pote esser sur un singule folio A4. Le vocabulario es in grande partes cognoscite in avantia - del parolas estranier de tu lingua materne o del linguas estranier que tu ha apprendite. Il ha multe materiales, bon dictionarios, manuales, grammaticas etc. Visita le Servicio de Libros, selige le titulos que tu desira, compra e paga los immediatemente per carta a credito. Alora tu es ben equipate pro tu studios.

  • Si tu ja ha alcun experientia con interlingua, alora tu pote apprender plus per leger su litteratura. Il ha numerose titulos traducite e original, publicate in interlingua. Illos presenta un linguage ric. On apprende multo per leger. Compra e lege al minus tres libros in interlingua in 2007! (Consulta tu plancas in casa, si tu ja ha titulos que tu non ha legite - o visita le Servicio de Libros ci in www.interlingua.com e compra le nove titulos immediatemente.)

  • Le 15 de januario es le international Die de Interlingua. Le organisationes e usatores de interlingua combina lor effortios pro facer qualcosa extra e assi attraher le attention de nove interessatos a interlingua. - Lege plus super le Die de Interlingua e que tu pote facer ci.

  • Brevemente dicite: Adjuta le UMI in 2007 con placiar interlingua sur le mappa mundial (e memora informar le UMI e/o tu organisation national de interlingua super tu activitates - isto sempre da gaudio).
Un multo bon e active 2007 pro interlingua!
Initio del pagina