Louise Delnoy-Sijstermans, qui durante 12 annos esseva le administrator del Union Mundial pro Interlingua, ha morite.

UMI  Louise Delnoy-Sijstermans, Nederland, qui 1994-2006 esseva le administrator del Union Mundial pro Interlingua (UMI), moriva le 13 de februario, 88 annos de etate.

Louise Delnoy-Sijstermans, 2005Con diligentia e accuratessa, illa prendeva cura del administration del UMI durante un periodo importante de 12 annos, e illa esseva i.a. un diligente participante in le arrangiamento del conferentias international de interlingua in collaboration con su sposo, Jan, qui moriva in decembre 2000 de un cancere maligne e incurabile.

Louise Delnoy-Sijstermans nasceva le 31 de maio 1931. In 1957, Louise & Jan Delnoy se maritava. Illes ha quatro infantes – un filio e tres filias. Le duo sempre active e positive participava pro le prime vice in un conferentia de interlingua in Nederland in 1989. In 1994 Louise Delnoy-Sijstermans sequeva Bent Andersen, Danmark, como administratrice e tresorera del UMI post haber essite pro un periodo membro del consilio directive del Societate Interlingua-Nederland desde le fundation post le conferentia in 1989. Durante le conferentia in Strasbourg, Francia, in 1997 illes celebrava lor 40esime anniversario de maritage. In commun, illes esseva le tresoreros (in plural) del conferentias, e absolutemente toto esseva in ordine usque minime detalio.

In 2006, Louise Delnoy-Sijstermans passava le administration a Alberto Mardegan ma continuava durante un periodo assister e i.a. arrangiar con le imprimeria que Panorama es expedite a cinque continentes.

Louise Delnoy-Sijstermans anque esseva active in le movimento international de feminas pro le pace e pro equalitate e recipeva in 1995 le distinction regal como Cavallero del Ordine de Oranje Nassau pro su grande labor como "ambassator pro pace e equalitate" in numerose organisationes local, regional e mundial. Le ordine esseva presentate per le burgomaestro del parve urbe Raalte in le casa municipal.

Le perdita de Louise Delnoy-Sijstermans es grande. Illa esseva un persona multo gentil e amabile con un grande corde pro su familia, pro su amicos e pro interlingua. Su labor pro interlingua ha essite admirabile e valorose. Illa mancara a nos omnes. Nostre pensatas va a su familia.

Que vive le memoria de Louise Delnoy-Sijstermans.

Le consilio executive del Union Mundial pro Interlingua