Skip navigation.
Home

Abonamento de Panorama pro 2016 cresce – ma include le magazin digital

Post octo annos sin cambio le precio de abonamento cresce, ma omne abonatos del magazin imprimite recipe ora anque le version digital.

UMIPanorama in interlingua  Le precio de un abonamento a Panorama va crescer ab le 1 de januario 2016. Le causa es le costos sempre crescente de impression e porto postal, de novo ab januario 2016. Le precios actual del abonamento ha essite le mesme desde januario 2008, i.e. octo plen annos sin cambio.

Ab le 1 de januario 2016, le abonamento annual de Panorama con sex editiones con 168 paginas in interlingua costara pro 1 ex. 25 euros (inclusive porto postal); pro 2 ex. 39 euros; pro 5 ex. 79 euros. Como un recompensa pro le altiamento e pro adder extra valor al abonamento, nos da un extra abonamento digital de Panorama includite in le precio del abonamento imprimite (on debe inviar su adresse e e-posta al administration del Union Mundial pro Interlingua pro usar iste offerta).

Le abonamento digital remane sin cambio: 10 euros pro un anno. On pote assi sparniar multe moneta per seliger le abonamento digital, ubi on recipe Panorama como un file PDF in plen colores (contrari al magazin imprimite in blanc/nigre) e quasi immediatemente post le fin del redaction, sin deber attender le impression e expedition postal.

Pois que le altiamento del abonamento ha debite esser decidite si proxime al cambio del anno, le abonamento – pagate per organisationes national de interlingua que include Panorama in le membrato total – remanera a 15 euros pro 2016 ma essera altiate pro 2017. Isto da a omne organisationes national le tempore pro regular le precio de membrato.

Abona te a Panorama

Le redaction de Panorama e le administration del Union Mundial pro Interlingua (UMI)

Initio del pagina