Skip navigation.
Home

Grande conferentia de interlingua in septembre in Espania

Invita tote le familia al grande conferentia de interlingua sur le Costa Blanc espaniol le 19-24 de septembre. Un rapide inscription ante le 31 de julio 2015 resulta in un disconto del precio.

Le plagia de Benidorm
Le plagia famose de Benidorm al costa est de Espania es proxime al centro conferential. Photo: Hotel Tanit

UMI21me conferentia international de interlingua  Pro le prime vice Espania essera le hospite, quando le Union Mundial pro Interlingua (UMI) da su benvenita al 21me conferentia international de interlingua in Benidorm le 19-24 de septembre.

Benidorm es le destination touristic le plus grande sur le Costa Blanc verso le Mediterraneo al costa est de Espania con 300 dies con sol per anno e un temperatura in media de 19 grados. Benidorm es situate in le provincia Alicante con un hora de conducer nord de Valencia e con le aeroporto international de Alicante, El Altlet, solmente 60 km ab le centro de Benidorm e con un autobus shuttle directemente ab le aeroporto.

Il es anque le prime vice que un conferentia de interlingua non habera loco in le fin de julio, ma le temperatura es plus agradabile - e ancora alte - in septembre, ubi le precios al mesme tempore es minor. Durante le passate duo decennios le conferentias de interlingua non ha essite arrangiate in un hotel, como illos comenciava in 1955, ma in centros conferential.

Programma sub preparation

Le arrangiatores spera totevia que le ben cognoscite atmosphera agradabile del conferentias remane le mesme inter le multe usatores e interessatos de interlingua qui sperabilemente trovara lor via a Benidorm pro parlar in e super interlingua, excambiar ideas, inspirar le unes le alteres a como diffunder le uso practic del lingua ancora plus, e multo plus.

Le UMI celebra iste anno su 60esime anniversario. Le UMI esseva fundate durante le prime conferentia de interlingua in Tours, Francia, le 28 de julio 1955. Le programma pro le conferentia iste anno es sub preparation, e le novas essera publicate, quando le puzzle succede esser facite.

Mappa de BenidormSabbato le 19 de septembre es le die de arrivata, ubi on trova su placia e su camera, e ubi le ultime preparationes es facite, ante que le conferentia aperi officialmente dominica matino le 20 e dura usque - e inclusive - mercuridi le 23 con programma, discussiones, excursiones, intertenimento e tote le altere ingredientes que sempre ha facite le conferentias de interlingua un successo. Jovedi le 24 de septembre es le die de partita post le ultime sessiones.

Hotel Tanit es le quadro del conferentia. Illo presenta cameras moderne e tote facilitates necessari, inclusive accesso gratuite a Internet. Le hotel es situate in prime linea verso le plagia.

Disconto del precio a inscription rapide

Le precio pro participar le 19-24 de septembre es - si on se inscribe ante le 31 de julio 2015 - 320 euros in camera duple e 400 euros in camera singule. Juvenes nascite in 1988 e postea obtene un reduction del precio e debe pagar 240 euros in camera duple o triple. Le conferentia non dispone de un illimitate numero de cameras, dunque on debe reager rapidemente e inscriber se e pagar, si on vole esser secur de haber le camera preferite. Omne cameras duple, ma non le cameras singule, ha vista al mar. Post le 31 julio e ante le 5 de septembre, que es le ultime possibilitate de inscriber se, le precio de participation cresce a 270 euros pro juvenes in camera duple o triple, 350 euros in camera duple e 430 euros in camera singule.

Le formulario de inscription se trova in le pagina del conferentia a www.interlingua.com/conferentia/2015. On debe pagar, quando on se inscribe; vide le numero de conto etc. sur le formulario de inscription.

Initio del pagina