Skip navigation.
Home

Felice Natal e bon anno nove 2015!

Gratias pro le supporto in 2014. Nos besonia lo de novo in 2015, dunque assiste nos, per favor, in promover interlingua per omne canales.

UMIFelice Natal e bon anno nove 2015  Le consilio executive del Union Mundial pro Interlingua (UMI) desira a omne membros, collaboratores, supportatores e usatores de interlingua in tote le mundo un felice Natal e un multo bon e successose anno nove, 2015.

2014 ha essite ancora un anno active, durante le qual multes ha laborate pro diffunder le cognoscentia a e uso de interlingua - e durante le qual multe nove personas in tote le mundo ha apprendite super interlingua. Multes de illes anque ha apprendite interlingua pro usar lo activemente. E isto es, naturalmente, le plus importante: que interlingua es usate activemente e assi vive in omne functiones e situationes.

Nos in le consilio executive del UMI, qui es le equipa responsabile pro le functiones quotidian del organisation mundial, es multo grate a vos omnes pro tote le labor que vos face e ha facite - parve initiativas o grande campanias, toto es importante, quando il tracta de assecurar que sempre plus apprende e usa interlingua pro communication sin frontieras, como es le motto de interlingua.

Vos omnes es importante in iste labor - si vos labora activemente pro diffunder interlingua, e si vos "solmente" apprende interlingua pro usar lo in tote le situationes que place e es utile a vos. Le plus multe personas qui cognosce interlingua e qui usa interlingua, le melior. Dunque multe gratias a vos omnes pro le supporto durante 2014.

Le UMI habeva in octobre 2014 un nove secretario general, Julian Mendez, qui ja ha comenciate su labor, e nos spera que le UMI assi pote devenir ancora plus active e esser un ancora plus importante ligamine pro coordinar le multe initiativas in le mundo que promove interlingua. Sperabilemente nos pote, durante 2015, facer nostre rete de representantes e organisationes national functionar ancora melio, assi que nos pote in commun crear inspiration, nove ideas, nove initiativas, nove campanias, nove activitates, nove arrangiamentos etc. que omnes pote promover interlingua ancora plus.

Nos spera que tu - como membro e/o como usator de interlingua - vole supportar nos e dar nos un mano. Nos besonia omne manos - pro le labor practic de promotion e pro un bon e inspirante collaboration a transverso de linguas, paises e continentes.

Benvenite a un excellente nove anno 2015, e multe gratias pro le anno 2014 que tosto fini!

Le consilio executive del
Union Mundial pro Interlingua

Sven Frank, presidente   |   Julian Mendez, secretario general   |   Martijn Dekker, vice-secretario

Alberto Mardegan, administrator   |   Thomas Breinstrup, redactor del Panorama in interlingua

Initio del pagina