Skip navigation.
Home

Inspiration e energia in le belle estate nordic

  HALLO, TOTE LE MUNDO! Io ha un invitation a vos omnes (ah, si, forsan non omnes ma al minus omnes vos qui usa interlingua): Veni a Svedia iste estate, plus precisemente le 29 de julio al 3 de augusto 2014, e participa in le "superconferentia nordic" que deveni absolutemente special – e ubi nos pro le prime vice vole facer minus de "labor" e plus de "vacantias con interlingua".
    Sex dies – e cinque noctes – con omne repastos, camera, excursiones, conversationes in grande numero, excitante presentationes de multe themas interessante (sempre in interlingua ma non super interlingua), cursos effective ma intertenente e multo plus. Tote isto pro solmente 4.000 SEK/440 EUR per persona – e si tu inscribe te e tu familia ante le 5 de junio, tu obtenera un reduction del precio a 3.500 SEK/390 EUR per persona.

LE MAR ES POC METROS de nostre centro pro le 20me conferentia international de interlingua e le 14te incontro nordic de interlingua. Nos ha seligite le location con grande cura, e ora nos vermente spera que tu e tu familia vole supportar le grande arrangiamento per inscriber vos pro un septimana phantastic in compania international.
    Io garanti un experientia sin par, e io garanti que tu parla interlingua ben ja post breve tempore. Il es si inspirante esser con altere usatores de interlingua. Que nos deveni multissimes!
    Non postpone tu inscription. Veni a Svedia e experientia le bellissime estate nordic e le atmosphera energic e inspirante que es le resultato de un gruppo international. E memora inscriber te ... ja hodie! A revider in poc menses!

Iste commentario esseva publicate in le Editorial de Panorama in interlingua, januario-februario 2014. | Inscription e informationes: www.interlingua.dk/nordic2014.


Initio del pagina